اردو ورلڈ کینیڈا ( ویب نیوز )امن و امان کی صورتحال میں بہتری کے بعد اسلام آباد اور پنجاب میں فوج کی تعیناتی ختم کرنے کا فیصلہ کیا گیا ہے

چیف کمشنر آفس نے وفاقی دارالحکومت میں فوج کی تعیناتی ختم کرنے کے لیے وزارت داخلہ کو خط ارسال کر دیا ہے جس میں کہا گیا ہے کہ عوامی مفاد میں 10 مئی کا نوٹیفکیشن واپس لیا جائے۔

مراسلہ میں مزید کہا گیا ہے کہ اسلام آباد میں امن و امان برقرار رکھنے کے لیے فوج کو تعینات کیا گیا، وفاقی دارالحکومت میں امن و امان کی صورتحال تسلی بخش ہے۔

دوسری جانب پنجاب حکومت نے بھی فوج کو واپس بھیجنے کے لیے وزارت داخلہ کو خط لکھ دیا۔ فوجی دستے 9 مئی کے واقعات کے بعد تعینات کیے گئے تھے۔

واضح رہے کہ اسلام آباد میں پرتشدد واقعات کے پیش نظر فوج طلب کی گئی تھی، وفاقی دارالحکومت میں 10 مئی کو دفعہ 245 کا اطلاق کیا گیا تھا۔