اردوورلڈکینیڈا(ویب نیوز)بالی ووڈ اسٹار دپیکا پڈوکون نے حالیہ انٹرویو میں اس حقیقت سے پردہ اٹھا دیا کہ وہ کیوں مسلسل بڑے بجٹ اور بھاری معاوضے کی پیشکشوں کو مسترد کر رہی ہیں۔
اداکارہ نے واضح کیا کہ ان کے فیصلوں کی بنیاد صرف مالی فائدہ نہیں ہوتا بلکہ وہ ہر منصوبے کو اپنی ذاتی اقدار اور اصولوں کے تناظر میں پرکھتی ہیں۔ ان کے مطابق کوئی بھی کردار یا فلم اس وقت تک قابلِ قبول نہیں جب تک وہ انہیں اندر سے صحیح محسوس نہ ہو۔
دپیکا نے بتایا کہ انہوں نے حال ہی میں دو بڑے فلمی منصوبوں سے کنارہ کشی اختیار کی، حالانکہ ان میں معاوضہ بہت زیادہ تھا۔ ان کا کہنا تھا کہ ان کے لیے کیریئر میں سب سے اہم چیز ’’ایمانداری‘‘ ہے، اور یہ اصول وہ کسی قیمت پر چھوڑنے کو تیار نہیں۔ انہوں نے کہا کہ بعض لوگ یہ سمجھتے ہیں کہ اگر معاوضہ بڑا ہو تو فنکار فوراً راضی ہو جائے گا، لیکن میرے فیصلوں پر پیسہ اثرانداز نہیں ہوسکتا۔ ان کے مطابق فن وہی ہے جس میں انسان خود سے سچا رہے، اور وہ ہمیشہ ایسی ہی راہ اپنانا چاہتی ہیں۔
انٹرویو کے دوران اداکارہ نے اپنے طویل کیریئر کا جائزہ بھی لیا اور بتایا کہ وہ اعتراف کرتی ہیں کہ ماضی میں کچھ فیصلے ایسے کیے جو آج سوچنے پر مجبور کر دیتے ہیں۔ لیکن وہ اس عمل کو سیکھنے اور آگے بڑھنے کا حصہ سمجھتی ہیں۔ ان کے مطابق، جو فیصلے وہ آج کر رہی ہیں وہ پوری طرح ان کی شخصیت، سوچ اور اصولوں سے ہم آہنگ ہیں، اس لیے انہیں ان پر مکمل اعتماد ہے۔
دپیکا پڈوکون کا کہنا تھا کہ وہ ہمیشہ ایسے منصوبے چنتی ہیں جو دل سے قریب ہوں، اور جن میں وہ بطور فنکار اپنی سچائی برقرار رکھ سکیں۔ اداکارہ کے مطابق، یہی رویہ انہیں صنعت میں منفرد مقام دلاتا ہے اور انہیں اپنے فن سے جڑے رہنے میں مدد دیتا ہے۔
