اردو ورلڈ کینیڈا ( ویب نیوز ) ورلڈ کپ کے لیے کوالیفائی نہ کرنے والی کمزور ٹیم ویسٹ انڈیز کے ہاتھوں بھارت کی شرمناک شکست کے بعد بھارتی شائقین اپنی ٹیم پر برس پڑے۔
بھارت اور ویسٹ انڈیز کے درمیان تین ون ڈے میچوں کی سیریز کا دوسرا میچ بارباڈوس میں کھیلا گیا جس میں ویسٹ انڈیز نے بھارت کو 6 وکٹوں سے شکست دے کر تین ایک روزہ میچوں کی سیریز 1-1 سے برابر کر دی۔
ویسٹ انڈیز نے ٹاس جیت کر پہلے فیلڈنگ کا فیصلہ کیا۔ ہندوستانی ٹیم کا آغاز اچھا ہوا اور اوپنرز نے مشکل وکٹ پر 90 رنز کی شراکت قائم کی لیکن اس کے بعد وکٹیں گرنے لگیں اور پوری ٹیم 41ویں اوور میں 181 رنز پر ڈھیر ہوگئی۔بھارت کی جانب سے اوپنرز ایشان کشن نے 55 اور شبمن گل نے 34 رنز بنائے۔ پانچویں نمبر پر آنے والے سوریا کمار یادو نے 24 رنز بنائے، اس کے علاوہ کوئی بھی بھارتی بلے باز 20 کا ہندسہ عبور نہ کر سکا۔ ویسٹ انڈیز کے روماریو شیفرڈ اور گوڈکیش موتی نے تین تین وکٹیں حاصل کیں۔
ویسٹ انڈیز نے مطلوبہ ہدف 36.4 اوورز میں چار وکٹوں کے نقصان پر حاصل کر لیا۔ ویسٹ انڈیز کے شائی ہوپ نے ناقابل شکست 63 رنز بنائے جبکہ کارٹی نے ناقابل شکست 48 رنز بنائے۔ بھارت کی جانب سے شردل ٹھاکر نے تین اور کلدیپ یادیو نے ایک وکٹ حاصل کی۔کچھ شائقین اس بات پر مایوس ہیں کہ ہندوستان ایک ایسی ٹیم سے ہار گیا جو ورلڈ کپ کے لیے کوالیفائی کرنے میں ناکام رہی۔
مڈل آرڈر کی ناکامی پر بھارتی شائقین کافی پریشان ہیں۔اس سے قبل بھارت میں ویسٹ انڈیز کے ساتھ سیریز کھیلنے کے معاملے پر سوالات اٹھ رہے تھے کہ ہم اتنی کمزور ٹیم کے ساتھ سیریز کیوں کھیل رہے ہیں؟واضح رہے کہ پہلے ون ڈے میچ میں آسان جیت کے بعد دوسرے میچ میں ویرات کوہلی اور کپتان روہت شرما کو آرام دیا گیا تھا جس پر شائقین یہ کہتے نظر آرہے ہیں کہ کوہلی اور روہت کے بغیر بھارتی بیٹنگ لائن اسکور نہیں کر سکتی۔
