اردوورلڈکینیڈا( ویب نیوز)وزیر دفاع خواجہ آصف نے آزاد کشمیر میں جاری احتجاجی مظاہروں پر ردعمل دیتے ہوئے عوام سے پرامن رہنے کی اپیل کی ہے۔
سماجی رابطے کی ویب سائٹ ایکس پر جاری بیان میں انہوں نے کہا کہ آزاد کشمیر کے مظاہرین کو مقبوضہ کشمیر کی ان تین نسلوں کی قربانیوں پر غور کرنا چاہیے جنہوں نے آزادی کے لیے اپنی جوانیاں جیلوں میں گزاری ہیں اور سینوں پر گولیاں کھا کر اپنی تاریخ رقم کی ہے۔
خواجہ آصف نے کہا کہ کشمیری عوام روزانہ پاکستان سے محبت کی بھاری قیمت ادا کرتے ہیں۔ انہوں نے یاد دلایا کہ کشمیر کی آزادی کی جنگوں میں پنجابی، پختون، بلوچ اور سندھی فوجیوں نے اپنی جانیں قربان کیں، اور پاکستان نے ہمیشہ کشمیری عوام کے ساتھ کھڑے رہنے کے لیے اپنے وجود کو داؤ پر لگایا ہے۔
آزاد کشمیر میں جو اسوقت حضرات احتجاج کر رہے ھیں۔ اسکے فائدہ یانقصان ،درست یا غلط
کی بحث میں جاۓ بغیر صرف ان احتجاجی حضرات سے درخواست ھے کہمقبوضہ کشمیر کے مسلمانوں کی تین نسلوں کی جدوجہد اور قربانیوں کی داستان پہ غور کریں۔ جو آپکو میسر ھے اسکا عشر عشیر کا بھی وہ تصور نہیں کر سکتے۔…— Khawaja M. Asif (@KhawajaMAsif) October 1, 2025
وزیر دفاع نے مزید کہا کہ ان کے انتخابی حلقے سیالکوٹ میں کشمیری مہاجرین کی بڑی تعداد آباد ہے، اور اکتوبر 1947 میں جب جموں سے سیالکوٹ کی طرف ہجرت ہوئی تو ایک لاکھ کشمیری مسلمان شہید ہوئے، ہزاروں خواتین کو اپنی عزتوں کی قربانی دینا پڑی اور کئی کو اغوا کیا گیا۔ ان کے مطابق آج بھی ان علاقوں کے گھروں میں ایسے خاندان بستے ہیں جنہوں نے پاکستان سے محبت کی قیمت اپنی جانوں سے ادا کی۔
