سری لنکا اور بنگلہ دیش کی ٹیموں کے درمیان 6 نومبر کو دہلی میں میچ شیڈول ہے اور اس سے قبل آئی سی سی نے دہلی میں فضائی آلودگی کا جائزہ لینا شروع کر دیا ہے۔ اس حوالے سے ماہرین کی رائے لے کر کھلاڑیوں کی صحت کے تحفظ کا خیال رکھیں گے۔سری لنکا نے ہفتے کو ارون جیٹلی اسٹیڈیم میں شیڈول ٹریننگ سیشن منسوخ کردیا،
میڈیا رپورٹس کے مطابق سری لنکن ٹیم کے ڈاکٹر نے شدید آلودگی کے باعث کھلاڑیوں کو ٹریننگ سے روک دیا جب کہ بنگلہ دیشی اسکواڈ نے ماسک لگا کر ٹریننگ کی، بنگلہ دیش نے جمعہ کو اپنا تربیتی سیشن منسوخ کر دیا تھا۔بھارتی میڈیا کا کہنا ہے کہ آئندہ دو روز میں دہلی میں آلودگی میں بہتری کا کوئی امکان نہیں، ایئر کوالٹی انڈیکس بڑھنے سے میچ خطرے میں پڑ سکتا ہے جب کہ انتظامیہ کھلاڑیوں کو ڈگ آؤٹ کے بجائے ڈریسنگ روم میں بٹھانے کا منصوبہ بنا رہی ہے۔ بھارتی میڈیا کے مطابق نئی دہلی میں اسٹیڈیم کے اطراف کے علاقوں میں چھڑکاؤ کرنے کا منصوبہ بھی بنایا گیا ہے جب کہ جمعرات کو دہلی میں فضائی ایمرجنسی نافذ کردی گئی۔
