اردو ورلڈ کینیڈا ( ویب نیوز ) یونان میں ٹرین حادثے میں 57 افراد کی ہلاکت کے خلاف ملک بھر میں مظاہرے جاری ہیں۔دارالحکومت ایتھنز سمیت ملک بھر میں ہزاروں افراد انصاف کے مطالبے اور حکومتی بدانتظامی کے خلاف احتجاج کے لیے سڑکوں پر نکل آئے۔

یونان کے مختلف شہروں میں پولیس اور مظاہرین میں جھڑپیں ہوئیں۔ مظاہرین کا کہنا ہے کہ یہ حادثہ نہیں بلکہ جرم ہے، اس پر خاموش نہیں رہ سکتے، ذمہ داروں کے خلاف سخت کارروائی کی جائے۔

واضح رہے کہ دو روز قبل یونان کے دارالحکومت ایتھنز اور تھیسالونیکی کے درمیان واقع شہر لاریسا میں مسافر ٹرین اور مال بردار ٹرین میں تصادم ہوا تھا جس کے نتیجے میں 57 افراد ہلاک اور 80 سے زائد زخمی ہوگئے تھے۔

برطانوی میڈیا کے مطابق حادثے میں مسافر ٹرین کی 4 بوگیاں پٹری سے اتر گئیں، 2 بوگیوں میں بھی آگ لگ گئی، مسافر ٹرین میں 350 کے قریب مسافر سوار تھے۔واقعے کے بعد یونان کے وزیر ٹرانسپورٹ نے استعفیٰ دے دیا جب کہ وزیراعظم نے ٹرین حادثے کو انسانی غلطی قرار دیتے ہوئے ملک بھر میں تین روزہ سوگ کا اعلان کیا ہے۔

یونانی حکومت نے ٹرین حادثے کی آزادانہ تحقیقات کا اعلان کیا ہے تاہم اہل خانہ حکومتی اقدامات سے مطمئن نہیں ہیں اور مزید اقدامات کا مطالبہ کر رہے ہیں۔