اردو ورلڈ کینیڈا ( ویب نیوز ) غزہ میں اسرائیل کے وحشیانہ حملوں کو ایک سال ہو گیا ہے جس پر اسرائیلی دارالحکومت تل ابیب سمیت مختلف ممالک میں احتجاج کیا جا رہا ہے۔غیر ملکی میڈیا کے مطابق اسرائیلی جارحیت کے خلاف لندن میں ہزاروں افراد نے احتجاجی مظاہرہ کیا اور غزہ میں فوری جنگ بندی کا مطالبہ کیا۔علاوہ ازیں فرانس میں مظاہرین نے غزہ اور لبنان میں اسرائیلی جارحیت کے خلاف احتجاجی مارچ کیا، پیرس میں لوگوں نے فلسطینی اور لبنانی پرچم لہراتے ہوئے اسرائیلی مظالم کے خاتمے کا مطالبہ کیا۔
دوسری جانب سویڈن میں سینکڑوں افراد نے فلسطینیوں سے اظہار یکجہتی کرتے ہوئے اسٹاک ہوم کی سڑکوں پر فلسطینی پرچم تھامے جنگ بندی کا مطالبہ کیا۔دوسری جانب اسرائیل میں بھی وزیراعظم نیتن یاہو کی حکومت کے خلاف بڑا مظاہرہ کیا گیا جس میں ہزاروں افراد تل ابیب کی سڑکوں پر نکل آئے اور یرغمالیوں کی رہائی کے لیے غزہ میں جنگ بندی معاہدے کا مطالبہ کیا۔اس کے ساتھ ہی تل ابیب میں مظاہرین نے نیتن یاہو پر شدید تنقید کی اور انہیں جنگ بندی کے معاہدے کی عدم موجودگی کا ذمہ دار ٹھہرایا۔
