اردوورلڈکینیڈا(ویب نیوز)ڈی جی آئی ایس پی آر نے یونیورسٹی آف تربت کا دورہ کیا، جہاں اساتذہ، فیکلٹی ممبران اور طلباء نے ان کا گرمجوشی اور پرتپاک استقبال کیا۔ دورے کے دوران ایک خصوصی نشست بھی منعقد کی گئی، جس میں طلباء اور اساتذہ نے قومی سلامتی اور دیگر اہم قومی امور پر تفصیلی تبادلہ خیال کیا۔
نشست کے دوران شرکاء نے مسلح افواج کے ساتھ تعاون اور یکجہتی کے عزم کا اظہار کیا تاکہ ملک کو درپیش قومی سلامتی کے چیلنجز کا مؤثر اور مربوط طریقے سے مقابلہ کیا جا سکے۔ اساتذہ نے کہا کہ یہ ملاقات نہ صرف معلوماتی رہی بلکہ اس نے نوجوان نسل کی اہمیت کو اجاگر کیا، جو ملکی ترقی اور مستقبل کی تعمیر میں کلیدی کردار ادا کرتی ہے۔
طلباء نے بھی اپنے خیالات کا اظہار کرتے ہوئے کہا کہ ڈی جی آئی ایس پی آر کے ساتھ ہونے والی نشست ان کے علم میں اضافہ اور رویوں میں مثبت تبدیلی کا باعث بنے گی۔ انہوں نے کہا کہ اس طرح کے اقدامات طلبہ کو ملکی دفاع اور قومی خدمت کے بارے میں شعور فراہم کرتے ہیں اور انہیں ذمہ داری کا احساس دلاتے ہیں۔
نشست کے اختتام پر شرکاء نے قومی یکجہتی، شعور اور مثبت بیانیہ کے فروغ کے لیے مشترکہ جدوجہد کی ضرورت پر اتفاق کیا۔ انہوں نے زور دیا کہ قومی سلامتی کے چیلنجز کا مقابلہ کرنے کے لیے تعلیم، آگاہی اور افواج کے ساتھ تعاون انتہائی اہم ہے۔
ڈی جی آئی ایس پی آر نے بھی شرکاء کو اس عزم کا یقین دلایا کہ افواج اور نوجوان نسل کے درمیان مضبوط رابطہ ملک کی سلامتی اور ترقی کے لیے ضروری ہے، اور اس طرح کے دورے اس مقصد کو فروغ دینے میں مددگار ثابت ہوتے ہیں۔
