اردو ورلڈ کینیڈا ( ویب نیوز )پاکستان تحریک انصاف (پی ٹی آئی) کے چیئرمین عمران خان نے کہا ہے کہ کور کمانڈر ہاؤس پر حملے کے مقدمے میں ڈاکٹر یاسمین راشد کی عدالت سے بری ہونے کا مطلب ہے کہ تحریک انصاف کا بطور جماعت اس سارے معاملے سے کوئی تعلق نہیں
سماجی رابطے کی ویب سائٹ پر اپنے ایک ٹویٹ میں انہوں نے لکھا کہ پی ٹی آئی پر اس بہانے کریک ڈاؤن کیا گیا اب اس بیانیے کی دھجیاں اڑا دی گئی ہیں۔
اب جبکہ ڈاکٹر یاسمین راشد کو کور کمانڈر لاہور کی رہائشگاہ میں جلاؤ گھیراؤ کے معاملے میں بالکل معصوم (بےگناہ) قرار دے دیا گیا ہے تو اس کا صاف مطلب یہ ہےکہ مرکزی پنجاب کی صدر کے طور پر (ڈاکٹر یاسمین راشد) اور پاکستان تحریک انصاف کا بطور جماعت اس جلاؤ گھیراؤ میں قطعاً کوئی کردار… pic.twitter.com/sei1oMm2Hb
— Imran Khan (@ImranKhanPTI) June 3, 2023
واضح رہے کہ ہفتہ کو انسداد دہشت گردی کی عدالت نے یاسمین راشد کو جناح ہاؤس حملہ کیس میں بری کردیا تھا۔
پولیس نے یاسمین راشد کو عدالت میں پیش کر کے جسمانی ریمانڈ کی استدعا کی جسے عدالت نے مسترد کرتے ہوئے اسے مقدمے سے بری کر دیا۔
یہ بھی یاد رہے کہ القادر ٹرسٹ کرپشن کیس میں پاکستان تحریک انصاف (پی ٹی آئی) کے چیئرمین عمران خان کی گرفتاری کے بعد ملک بھر میں احتجاج کے دوران کارکنوں نے اہم املاک پر دھاوا بول دیا اور اس دوران جناح کے مزار پر توڑ پھوڑ بھی کی
جناح ہاؤس پر حملوں کے حوالے سے پی ٹی آئی کے ٹکٹ ہولڈر عباد فاروق کی مبینہ آڈیو منظر عام پر آئی ہے جس میں وہ کہہ رہے ہیں کہ کور کمانڈر ہاؤس کو آگ لگانے کا حکم یاسمین راشد نے دیا تھا۔
اس مبینہ آڈیو کے تناظر میں حکومت کی جانب سے کہا جا رہا ہے کہ یاسمین راشد اس حملے کی ماسٹر مائنڈ ہیں۔
