اردوورلڈکینیڈا( ویب نیوز)وفاقی حکومت سرکاری محکموں کے حجم میں کمی لانے کے لیے اپنے مجوزہ قبل از وقت ریٹائرمنٹ پروگرام کے بارے میں معلوماتی خطوط تقریباً 70 ہزار ملازمین کو بھیج رہی ہے۔ٹریژری بورڈ کے صدر کے دفتر کے ڈائریکٹر کمیونیکیشن محمد کمال کے مطابق تقریباً 68 ہزار سرکاری ملازمین کو یہ خط بھیجا جا رہا ہے جو اس پروگرام کے لیے اہل ہوسکتے ہیں۔حکومتِ کینیڈا 2023-24 میں پبلک سروس کی تعداد میں ریکارڈ 368 ہزار اسامیوں سے تقریباً 40 ہزار ملازمتیں کم کرنے کا ہدف رکھتی ہے۔ گزشتہ سال تقریباً 10 ہزار ملازمتیں ختم کی گئی تھیں۔
حکومت چاہتی ہے کہ ریٹائرمنٹ کی شرح بڑھائی جائے اور نوجوان ملازمین کی جبری برطرفی سے بچا جائے۔ اسی مقصد کے لیے ایک رضاکارانہ قبل از وقت ریٹائرمنٹ اسکیم پیش کی جا رہی ہے جس کے تحت ملازمین بغیر پنشن جرمانے کے پہلے ہی ریٹائر ہو سکیں گے۔
کینیڈین پریس کے ساتھ شیئر کیے گئے خط میں کہا گیا ہے کہ فی الحال ملازمین کو کوئی اقدام کرنے کی ضرورت نہیں ہے۔ پروگرام صرف انہی ملازمین کے لیے ہو گا جو ٹریژری بورڈ کے مقرر کردہ اصولوں کے تحت درخواست دیں گے۔خط میں کہا گیا ہےیہ اصول اہم خدمات اور اداروں کے کام کو متاثر ہونے سے بچانے کے لیے بنائے جائیں گے، اس لیے کسی ملازم کی درخواست قبول ہونا ضروری نہیں۔
وفاقی بجٹ کے مطابق حکومت یہ ایک سالہ ریٹائرمنٹ پروگرام جنوری سے نافذ کرنا چاہتی ہے، تاہم محمد کمال کا کہنا ہے کہ اس کے لیے ابھی قانون سازی ہونا باقی ہے۔
خط کے مطابق درخواست دینے کی آخری تاریخ 15 جنوری 2026 کے بعد 120 دن یا قانون نافذ ہونے کے 120 دن کے اندر ہوگی—جو بھی تاریخ بعد میں آئے۔ جن ملازمین کی درخواستیں منظور ہوں گی انہیں 300 دنوں کے اندر ریٹائر ہونا ہوگا۔
محمد کمال نے یہ نہیں بتایا کہ کیا مختلف محکمے اس پروگرام میں دلچسپی کے اندازے سے پہلے مزید کٹوتیوں کا اعلان کریں گے یا نہیں۔ ان کا کہنا تھا کہ زیادہ سے زیادہ کمی قدرتی سبکدوشی اور رضاکارانہ رخصتی کے ذریعے کی جائے گی اور جہاں ممکن ہوگا ملازمین کو دیگر جگہوں پر تعینات کیا جائے گا۔
پبلک سروس الائنس آف کینیڈا (PSAC) کی صدر شیرون ڈیسوسا نے گزشتہ ماہ کہا تھا کہ بڑھتی ہوئی مہنگائی کے باعث زیادہ لوگ اس پروگرام میں شامل ہونے میں دلچسپی نہیں لیں گے۔ بدھ کو اپنے بیان میں انہوں نے کہا کہ حکومت نے ابھی تک پروگرام کی مکمل تفصیلات نہیں بتائیں اور قبل از وقت ریٹائرمنٹ کی صورت میں ملازمین اپنے سروس عرصے کے مطابق ملنے والی یکمشت رقم سے بھی محروم ہو سکتے ہیں۔
ان کا کہنا تھا کہ یونین جبری برطرفیوں سے بچانے کی کوششوں کی حمایت کرتی ہے اور تمام ملازمین کو چاہیے کہ جلد بازی میں کوئی فیصلہ نہ کریں اور اپنے یونین نمائندوں سے مشورہ کریں۔
انہوں نے واضح کیا کہ کوئی بھی رضاکارانہ پروگرام یونین سے مذاکرات کے بغیر نافذ نہیں ہوسکتا کیونکہ ملازمین کو اپنے حقوق سے دستبردار ہونے پر مجبور نہیں کیا جا سکتا۔
ایک اور یونین کینیڈین ایسوسی ایشن آف پروفیشنل ایمپلائز — کے صدر نیتھن پریئر نے کہا کہ قبل از وقت ریٹائرمنٹ کا پروگرام پبلک سروس پنشن فنڈ سے چلایا جائے گا، اور اس میں نوجوان ملازمین اپنے کیریئر کے دوران اس پروگرام کی نصف لاگت ادا کریں گے۔
پریئر نے کہاحکومت سرکاری ملازمین کے پیسے کو اپنا سمجھ کر استعمال کر رہی ہے، جو ناانصافی کے زمرے میں آتا ہے۔انہوں نے کہا کہ یونین رضاکارانہ رخصتی کے پروگرام کی مخالف نہیں مگر حکومت کو یہ سب مشاورت اور مناسب منصوبہ بندی کے بعد کرنا چاہیے۔
