اردو ورلڈ کینیڈا ( ویب نیوز )وزیراعظم شہباز شریف نے کہا ہے کہ الیکشن ہونے چاہئیں، لیکن موجودہ حالات میں انتخابات ممکن نہیں۔
وزیراعظم شہباز شریف کی زیر صدارت مسلم لیگ (ن) کا سپریم کورٹ میں جاری مقدمات اور سیاسی صورتحال پر مشاورتی اجلاس ہوا جس میں قانونی ماہرین وفاقی وزیر قانون نذیر تارڑ، ملک احمد خان، منصور اعوان، عطاء اللہ تارڑ اور دیگر نے شرکت کی۔ ایاز صادق بھی موجود تھے اور احد چیمہ نے بھی شرکت کی۔
ذرائع کے مطابق ملاقات میں سپریم کورٹ میں کل ہونے والی سماعت کے آئینی اور قانونی پہلوؤں پر غور کیا گیا
اجلاس سے خطاب کرتے ہوئے وزیراعظم شہباز شریف نے کہا کہ پنجاب اور خیبرپختونخوا میں اکتوبر سے پہلے انتخابات کرانا مشکل ہے۔
وزیر اعظم شہباز شریف نے کہا کہ مہنگائی کی لہر پر جلد قابو پالیا جائے گا، ہم تعمیری سیاست پر یقین رکھتے ہیں، یہ وقت تخریبی سیاست کا نہیں ہے ۔
وزیراعظم شہباز شریف نے مسلم لیگ (ن) کی پارلیمانی پارٹی کا اجلاس بھی طلب کر لیا ہے۔ اعظم نذیر تارڑ سیاسی حکمت عملی پر ارکان کو بریفنگ دیں گے۔
