اردو ورلڈ کینیڈا ( ویب نیوز ) لاہور ہائی کورٹ نے پاکستان کرکٹ بورڈ (پی سی بی) کے چیئرمین کے انتخاب کی اجازت دے دی۔
عدالت نے چیئرمین پی سی بی کے انتخاب کے خلاف حکم امتناعی واپس لے لیا۔
واضح رہے کہ 27 جون کو لاہور ہائیکورٹ کے جسٹس انور حسین نے شہری کی درخواست پر فیصلہ سناتے ہوئے چیئرمین پی سی بی کا انتخاب روکنے کا حکم دیتے ہوئے وفاقی حکومت، پی سی بی الیکشن کمشنر اور دیگر فریقین کو نوٹس جاری کرتے ہوئے جواب طلب کیا تھا۔
عدالتی حکم امتناعی پر پی سی بی نے عدالت سے رجوع کیا اور درخواست میں کہا کہ اس سے قبل یہ کیس لاہور ہائی کورٹ کے جسٹس شاہد کریم سن رہے تھے تاہم انہوں نے اس پر حکم امتناعی جاری نہیں کیا۔ جسٹس انور حسین نے تمام دلائل سننے کے بعد حکم امتناعی کی درخواست پر فیصلہ سناتے ہوئے اس حوالے سے تمام درخواستوں کو یکجا کرنے کے لیے چیف جسٹس کو بھجوا دیا۔
یہ بھی پڑھیں
پی سی بی کی چیئرمین شپ پر پیپلز پارٹی کا حق،ذکا اشرف ہی چیئرمین ہوں گے،فیصل کریم
واضح رہے کہ بلوچستان ہائی کورٹ اور پشاور ہائی کورٹ نے بھی چیئرمین پی سی بی کا انتخاب روکنے کا حکم جاری کیا ہے۔چیئرمین پی سی بی کا انتخاب 27 جون کو ہونا تھا تاہم بلوچستان ہائی کورٹ کے فیصلے کے بعد انتخاب ملتوی کردیا گیا تھا۔واضح رہے کہ چند روز قبل پیپلز پارٹی نے ذکا اشرف کو چیئرمین پی سی بی بنانے کا مطالبہ کیا تھا جس کے بعد وزیر اعظم شہباز شریف نے پاکستان کرکٹ بورڈ کے بورڈ آف گورنرز کے لیے ذکا اشرف اور مصطفی رمدے کے ناموں کی منظوری دی تھی۔
