اردو ورلڈ کینیڈا ( ویب نیوز)پاکستان مسلم لیگ (ن) نے کہا ہے کہ اعلیٰ عدالتی شخصیت اپنے عہدے پر برقرار رہنے تک انتخابات منظور نہیں ہیں۔
لاہور ماڈل ٹاؤن میں وزیراعظم شہباز شریف کی زیر صدارت مسلم لیگ (ن) کا اہم ترین مشاورتی اجلاس ہوا جس میں مرکزی رہنماؤں نے شرکت کی جب کہ نواز شریف ویڈیو لنک کے ذریعے موجود تھے۔

ملاقات میں شہباز شریف نے شرکا کو پی ٹی آئی سے مذاکرات پر بریفنگ دی اور مطالبات سے آگاہ کیا۔
مسلم لیگ ن کے اجلاس میں فیصلہ کیا گیا کہ ملک بھر میں ایک ہی دن انتخابات اور مذاکرات کے حوالے سے تمام اتحادیوں کو اعتماد میں لیا جائے گا۔ اجلاس میں یہ بھی فیصلہ کیا گیا کہ آئی ایم ایف سے فنڈز ملنے کے بعد ہی عام انتخابات کرائے جائیں گے۔
قائد مسلم لیگ (ن) نواز شریف نے کہا کہ ملک کو نقصان پہنچانے اور مذاق اڑانے والوں کے خلاف کارروائی ہونی چاہیے۔ انہوں نے کہا کہ تمام جماعتیں اپنا کردار ادا کریں کیونکہ کچھ لوگ ملک کی ترقی کو نہیں سمجھتے، ہمیں صرف ملک اور قوم کا سوچنا ہے۔
وزیراعظم شہباز شریف نے کہا کہ عوام کو ریلیف دینے کی کوشش کر رہے ہیں، جلد کامیاب ہوں گے اور عوام کو خوشخبری دیں گے۔