اردوورلڈ کینیڈا ( ویب نیوز)وزیر دفاع خواجہ آصف نے کہا ہے کہ پاکستان میں نومبر میں انتخابات ہوں گے تاہم انتخابات میں ایک سے دو ماہ کی تاخیر ہو سکتی ہے۔

امریکی ٹی وی کو انٹرویو دیتے ہوئے خواجہ آصف نے کہا کہ 9 اگست کی شام تک اسمبلی تحلیل کر دی جائے گی جس کے بعد آئین کے مطابق 90 دن کے اندر انتخابات ہونا ضروری ہیں۔

انہوں نے کہا کہ پاکستان میں نومبر میں انتخابات ہوں گے، تاہم مخصوص حالات میں الیکشن کمیشن انتخابات کو ایک سے دو ماہ تک موخر کر سکتا ہے، تاہم انتخابات میں اس سے زیادہ تاخیر نہیں ہو سکتی۔

علاوہ ازیں میڈیا سے گفتگو کرتے ہوئے وزیر دفاع خواجہ محمد آصف نے کہا کہ انتخابات ایک سے دو ماہ میں ہونے چاہئیں کیونکہ کوئی نئی حلقہ بندیاں نہیں ہو رہیں، نواز شریف انتخابات سے قبل پاکستان ضرور آئیں گے۔

انہوں نے کہا کہ پی ٹی آئی ہمیں 20 سال پہلے کے سیاسی اور معاشی بحران کی طرف لے گئی۔ جمہوریت میں وزیراعظم آتے جاتے رہتے ہیں۔