اردو ورلڈ کینیڈا ( ویب نیوز ) ایپسٹین فائلز کے اجرا کے بعد برطانیہ کی سیاست ایک نئے اور سنگین بحران کی لپیٹ میں آ گئی ہے
جہاں وزیراعظم سر کیئر اسٹارمر کے استعفے کی قیاس آرائیاں تیزی سے گردش کرنے لگی ہیں۔ برطانوی میڈیا رپورٹس کے مطابق وزیراعظم کے قریبی مشیر مورگن مک سوینی کے اچانک استعفے نے حکومتی ایوانوں میں دباؤ مزید بڑھا دیا ہے اور اپوزیشن کے ساتھ ساتھ حکمران جماعت کے اندر سے بھی سوالات اٹھنے لگے ہیں۔ذرائع کے مطابق مورگن مک سوینی کا استعفیٰ ایسے وقت سامنے آیا ہے جب ایپسٹین فائلز میں کئی بااثر شخصیات کے نام منظرِ عام پر آئے ہیں، جس کے بعد حکومت پر شفافیت اور اخلاقی ذمہ داری کے حوالے سے شدید تنقید کی جا رہی ہے۔ اگرچہ وزیراعظم کیئر اسٹارمر نے تاحال استعفے سے متعلق کسی امکان کو مسترد یا قبول نہیں کیا
تاہم سیاسی حلقوں میں یہ بحث زور پکڑ چکی ہے کہ آیا وہ بڑھتے ہوئے دباؤ کا سامنا کر پائیں گے یا نہیں۔برطانوی کابینہ کے بیشتر وزرا نے سر کیئر اسٹارمر کی قیادت پر اعتماد کا اظہار کرتے ہوئے ان کی حمایت کا اعلان کیا ہے اور کہا ہے کہ حکومت اس بحران سے نکلنے کی صلاحیت رکھتی ہے۔ وزرا کا مؤقف ہے کہ محض قیاس آرائیوں کی بنیاد پر قیادت کی تبدیلی ملک کے مفاد میں نہیں ہوگی۔دوسری جانب اسکاٹ لینڈ لیبر کے سینئر رہنما انس سرور نے پارٹی قیادت میں تبدیلی کا مطالبہ کر کے سیاسی ہلچل میں مزید اضافہ کر دیا ہے۔ ان کا کہنا ہے کہ موجودہ صورتحال میں پارٹی کو نئی سمت اور مضبوط قیادت کی ضرورت ہے تاکہ عوام کا اعتماد بحال کیا جا سکے۔
واضح رہے کہ ایپسٹین فائلز کے اجرا کے بعد سابق برطانوی سفیر پیٹر مینڈلسن کے امریکی فنانسر جیفری ایپسٹین سے روابط سامنے آنے پر تنازع نے شدت اختیار کر لی ہے۔ انکشافات کے بعد اپوزیشن جماعتوں نے مکمل تحقیقات کا مطالبہ کرتے ہوئے حکومت پر دباؤ بڑھا دیا ہے، جبکہ عوامی سطح پر بھی شدید ردعمل دیکھنے میں آ رہا ہے۔
سیاسی تجزیہ کاروں کے مطابق اگر یہ بحران مزید طول پکڑتا ہے تو آنے والے دنوں میں برطانوی سیاست میں بڑے فیصلے اور غیر متوقع پیش رفت خارج از امکان نہیں، تاہم فی الحال وزیراعظم کیئر اسٹارمر کی سیاسی بقا کا دارومدار آنے والے دنوں میں ان کے اقدامات اور پارٹی کے اندر اتحاد پر ہوگا۔
