اردو ورلڈ کینیڈا ( ویب نیوز ) پاکستان کرکٹ ٹیم آئی سی سی مینز ٹی ٹوئنٹی ورلڈکپ کے سیمی فائنل کی دوڑ سے باہر ہوگئی

اگرچہ اس نے سنسنی خیز مقابلے کے بعد سری لنکا کو شکست دی ،تاہم مطلوبہ مارجن حاصل نہ کر سکی۔سپر ایٹ مرحلے کے اہم میچ میں سری لنکن کپتان نے ٹاس جیت کر پاکستان کو پہلے بیٹنگ کی دعوت دی۔ گرین شرٹس نے جارحانہ آغاز کیا اور اوپنرز نے پاور پلے میں ہی حریف بولرز پر دباؤ بڑھا دیا۔پاکستان کی جانب سے صاحبزادہ فرحان نے شاندار بیٹنگ کا مظاہرہ کرتے ہوئے 100 رنز کی دھواں دار اننگز کھیلی، جس میں دلکش اسٹروکس اور جارحانہ شاٹس شامل تھے۔

ان کا بھرپور ساتھ فخر زمان نے دیا، جنہوں نے 84 رنز بنا کر اسکور کو مستحکم کیا۔ دونوں بلے بازوں کی عمدہ شراکت کی بدولت پاکستان نے مقررہ 20 اوورز میں 8 وکٹوں کے نقصان پر 212 رنز کا بڑا مجموعہ اسکور بورڈ پر سجا دیا۔پاکستان کو سیمی فائنل میں رسائی کے لیے سری لنکا کو 147 یا اس سے کم اسکور پر آؤٹ کرنا تھا تاکہ رن ریٹ بہتر ہو سکے، تاہم یہ ہدف حاصل نہ ہو سکا۔213 رنز کے تعاقب میں سری لنکن بیٹرز نے بھرپور مقابلہ کیا اور میچ کو آخری اوورز تک سنسنی خیز بنا دیا۔

پاکستانی بولرز وقفے وقفے سے وکٹیں حاصل کرتے رہے، مگر مطلوبہ حد تک حریف ٹیم کو محدود نہ کر سکے۔ سری لنکا کی ٹیم مقررہ اوورز میں 207 رنز بنا سکی اور پاکستان نے میچ 5 رنز سے جیت لیا، تاہم یہ فتح سیمی فائنل تک رسائی کے لیے ناکافی ثابت ہوئی۔گروپ ٹو کی صورتحال کے مطابق نیوزی لینڈ نے 3 پوائنٹس اور بہتر رن ریٹ کی بنیاد پر سیمی فائنل میں جگہ بنا لی، جبکہ انگلینڈ پہلے ہی فائنل فور میں اپنی نشست یقینی کر چکا تھا۔یوں پاکستان کی جیت بھی اسے اگلے مرحلے تک نہ پہنچا سکی اور گرین شرٹس کا ورلڈکپ سفر سپر ایٹ مرحلے پر ہی اختتام پذیر ہوگیا۔ کرکٹ شائقین کے لیے یہ نتیجہ خاصا مایوس کن رہا، کیونکہ ٹیم نے بیٹنگ میں عمدہ کارکردگی دکھانے کے باوجود مطلوبہ مارجن حاصل نہ کی