سب جانتے ہیں کہ عدلیہ اور اسٹیبلشمنٹ پاکستانی سیاست پر اثرانداز ہوتے ہیں ،شاہد خاقان عباسی

194

اردو ورلڈ کینیڈا ( ویب نیوز )مسلم لیگ (ن) کے سینئر رہنما اور سابق وزیراعظم شاہد خاقان عباسی نے کہا ہے کہ پاکستان میں اسٹیبلشمنٹ مسئلے کا حل نہیں بلکہ اپنے آپ میں ایک مسئلہ ہے۔

لاہور کے الحمرا ہال میں لاہور لٹریچر فیسٹیول کے دوسرے روز شاہد خاقان عباسی نے خصوصی سیشن میں گفتگو کرتے ہوئے کہا کہ آئین موجود ہے لیکن اس کی بالادستی قائم کرنا بھی ضروری ہے اسٹیبلشمنٹ سمیت سب کو مل کر سیاسی مسائل حل کرنا ہوں گے، تاخیر ملکی مفاد میں نہیں۔

انہوں نے کہا کہ بدقسمتی سے کرپٹ لوگ اسٹیبلشمنٹ کے لیے قابل قبول ہیں، پاکستان میں اسٹیبلشمنٹ مسئلے کا حل نہیں بلکہ اپنے آپ میں ایک مسئلہ ہے۔

انہوں نے کہا کہ موجودہ سیاسی نظام میں چیلنجز کا سامنا کرنے کی صلاحیت نہیں، بیوروکریسی میں بھی متعلقہ وزارتوں کے مسائل حل کرنے کی صلاحیت نہیں، وفاقی ملازمین مراعات کے لیے صوبوں میں کام کرنے کو تیار ہیں۔

انہوں نے کہا کہ پارلیمنٹ میں ہونا عوام کی صوابدید ہے لیکن ایسا نہیں ہوتا، 50 فیصد سینیٹرز سیٹیں خرید کر سینیٹ میں پہنچ جاتے ہیں۔

سابق وزیراعظم نے کہا کہ سب جانتے ہیں کہ عدلیہ اور اسٹیبلشمنٹ پاکستانی سیاست پر اثرانداز ہوتے ہیں لیکن اب آئین اور قانون کی بالادستی کو یقینی بنانے کے لیے سب کو مل کر کام کرنا ہوگا۔