اردو ورلڈ کینیڈا ( ویب نیوز )پاکستان تحریک انصاف کے مرکزی رہنما فواد چوہدری نے کہا ہے کہ قومی سلامتی کا اجلاس ہو رہا ہے، اجلاس کے اعلان سے اداروں کی پوزیشن معلوم ہو جائے گی۔
سابق وفاقی وزیر اطلاعات فواد چودھری نے کہا کہ آئین بہت واضح ہے، پارلیمنٹ، ایگزیکٹو، عدلیہ کا اپنا اختیار ہے، یہ مذاق ہے، اسمبلی میں 42 افراد نے قرارداد پاس کی۔
فواد چوہدری نے مزید کہا کہ سادہ سی بات ہے 90 دن میں الیکشن نہ ہوئے تو آئین ختم ہو جائے گا۔ اس کے بعد نگراں حکومت کی مدت ختم ہو جائے گی، نگران وزیراعلیٰ الیکشن کرانے کے علاوہ سب کچھ کر رہے ہیں، نگران حکومت نے 22 اپریل کے بعد کوئی کام کیا تو آرٹیکل 6 کا اطلاق ہوگا۔
پاکستان تحریک انصاف کے رہنما فواد چوہدری نے کہا کہ ہم سو فیصد کہہ رہے ہیں کہ الیکشن کے لیے اے پی سی بلائی جائے، اسٹیبلشمنٹ اور موجودہ حکومت کے ساتھ بیٹھنے سے انکار نہیں، جس نے فیصلے کرنے ہیں ان کے ساتھ بیٹھیں گے، آئینی ترمیم کے علاوہ الیکشن آگے نہیں بڑھ سکتا، اتفاق رائے تب قائم ہوگا جب حکومت، اسٹیبلشمنٹ اور ہمیں سر جوڑ کر بیٹھنا ہوگا۔
انہوں نے کہا کہ اصل بات یہ ہے کہ عوام کے فیصلے سب کو ماننا ہوں گے، یہ بند کمروں میں نہیں ہو سکتے، رابطے ہم نہیں حکومت کو کرنے چاہئیں۔ آئین پر عمل نہ کیا تو ملک میں مارشل لاء لگے گا
