اردوورلڈ کینیڈا( ویب نیوز)پاکستان تحریکِ انصاف کے بانی عمران خان کی 5 اگست کو دی گئی احتجاجی کال کے باوجود راولپنڈی میں کوئی بڑا مظاہرہ دیکھنے کو نہیں ملا۔ اڈیالہ جیل کے اطراف سیکیورٹی سخت رہی اور عمران خان یا ان کی اہلیہ بشریٰ بی بی سے کسی اہل خانہ کی ملاقات نہ ہو سکی۔
ذرائع کے مطابق عمران خان کی تینوں بہنیں علیمہ خان، ڈاکٹر عظمیٰ اور نورین نیازی بذریعہ موٹروے چکری انٹرچینج تک پہنچیں، لیکن راولپنڈی پولیس نے انہیں وہاں سے آگے جانے کی اجازت نہ دی۔
پارٹی کی جانب سے اڈیالہ جیل کے قریب مظاہرے کی کال دی گئی تھی، تاہم صرف سینیٹر ہمایوں مہمند، ایم این اے مولانا نسیم علی شاہ اور ایم این اے ساجد خان مہمند داہگل چیک پوسٹ تک پہنچ سکے، جہاں پولیس نے انہیں روکتے ہوئے آگے جانے سے منع کر دیا۔
جیل میں ملاقات کے لیے نامزد چھ رہنماؤں میں سے صرف ترجمان بانی پی ٹی آئی نیاز اللہ نیازی گیٹ نمبر 5 تک پہنچ سکے، لیکن انہیں بھی فوری طور پر واپس جانے کی ہدایت کی گئی۔
ادھر دو وکلاء شمسہ کیانی اور اویس یونس اڈیالہ روڈ پر گورکھ پور ناکے تک آئے، لیکن سیکیورٹی اہلکاروں نے ان کا راستہ روک دیا۔ پارٹی کے دیگر اہم رہنماؤں جیسے سلمان اکرم راجہ، لطیف کھوسہ اور محمود خان اچکزئی کو بھی اڈیالہ روڈ پر واقع ایک ہاؤسنگ سوسائٹی کے قریب چیک پوسٹ سے آگے نہیں جانے دیا گیا۔
چند خواتین کارکن داہگل ناکے پر جمع ہوئیں اور نعرے بازی کی، تاہم مجموعی طور پر تحریک انصاف راولپنڈی میں کوئی بڑا سیاسی مظاہرہ کرنے میں ناکام رہی۔ مقامی رہنما اور کارکنان گرفتاری کے خدشے کے پیش نظر منظر سے غائب رہے۔
