نگراں وزیراعظم انوارالحق کاکڑ نے وفاقی کابینہ کا اجلاس کل طلب کرلیا۔ وفاقی کابینہ کے اجلاس میں ملک کی معاشی و سیاسی صورتحال کا جائزہ لیا جائے گا اور کابینہ کی اقتصادی رابطہ کمیٹی کی سفارشات کی بھی منظوری دی جائے گی۔کابینہ اجلاس میں گیس کی قیمتوں میں معقول اضافے سے متعلق ای سی سی کے فیصلے کی بھی توثیق کی جائے گی، غیر قانونی تارکین وطن کی واپسی سے متعلق پیش رفت کا جائزہ لیا جائے گا۔
وفاقی کابینہ کو غیر قانونی معاشی سرگرمیوں کے خلاف جاری آپریشنز کے نتائج سے بھی آگاہ کیا جائے گا، آئی ایم ایف حکام سے نومبر میں ہونے والے مذاکرات کے ایجنڈے کے حوالے سے بھی بریفنگ دی جائے گی جب کہ ملک میں امن و امان کی صورتحال کا بھی جائزہ لیا جائے گا۔