اسلام آباد ( ویب نیوز )ایف آئی اے لاہور نے فرحت شہزادی عرف فرح گوگی کے خلاف اربوں روپے کی کرپشن اور منی لانڈرنگ کا مقدمہ درج کرلیا۔
وفاقی تحقیقاتی ادارے نے اربوں روپے کی کرپشن پر پنجاب اینٹی کرپشن لاہور کی جانب سے بھیجی گئی درخواست پر فرح گوگی کے خلاف منی لانڈرنگ کا مقدمہ درج کیا، جس کے متن میں کہا گیا ہے کہ فرح گوگی نے گزشتہ حکومت میں آر پی اوز، کمشنرز، ڈی پی اوز اور ڈی سیز وغیرہ کے تبادلوں کے لیے اربوں روپے رشوت کے طور پر لیے گئے۔
ایف آئی اے کے مطابق فرح گوگی نے 2021 میں فیصل آباد انڈسٹریل اسٹیٹ میں 60 کروڑ روپے مالیت کی 10 ایکڑ زمین غیر قانونی طور پر سرکاری افسران کے علاوہ اپنی کمپنی المعیز ڈیریز اینڈ فوڈز پرائیویٹ لمیٹڈ کے نام صرف 8 کروڑ روپے میں الاٹ کی دباؤ کے ذریعے ٹھیکوں کے ٹینڈر غیر قانونی طور پر دیئے گئے اور کروڑوں روپے رشوت بھی لیے۔
مقدمے کے مطابق گزشتہ حکومت کے آخری 3 سالوں میں فرح گوگی کے ذاتی بینک اکاؤنٹس میں تقریباً 84 کروڑ روپے جمع کیے گئے جو ان کی کمائی ہوئی آمدنی سے میل نہیں کھاتے، 2019 اور 2020 میں فرح گوگی کے بینک اکاؤنٹس میں تقریباً 41 کروڑ روپے تھے۔
ذرائع کے مطابق تحقیقات کے دوران فرح گوگی کے اربوں روپے مالیت کے مزید بے نامی بینک اکاؤنٹس ملنے کا بھی امکان ہے، فرح گوگی کے نام پر بحریہ ٹاؤن میں کمرشل اور رہائشی پلاٹس، پلازے اور مکانات سمیت 52 کروڑ مالیت کے اثاثے بھی شامل ہیں
