اردوورلڈکینیڈا( ویب نیوز)پاک فوج کے سربراہ فیلڈ مارشل سید عاصم منیر مصر کے سرکاری دورے پر ہیں، جہاں وہ مصری قیادت سے ملاقاتوں میں فوجی تعاون اور دفاعی تعلقات کو مزید مضبوط بنانے پر بات چیت کر رہے ہیں۔
آئی ایس پی آر کے مطابق فیلڈ مارشل عاصم منیر نے قاہرہ میں مصری وزیر دفاع و دفاعی پیداوار جنرل عبدالماجد صقر اور مسلح افواج کے چیف آف اسٹاف لیفٹیننٹ جنرل احمد خلیفہ فتحی سے الگ الگ ملاقاتیں کیں۔ ملاقاتوں میں باہمی دلچسپی کے امور، علاقائی سلامتی کی صورتحال اور دفاعی اشتراک بڑھانے کے مختلف پہلوؤں پر تبادلہ خیال کیا گیا۔
فیلڈ مارشل عاصم منیر نے کہا کہ مصر پاکستان کا برادر اسلامی ملک ہے اور دونوں ممالک کے درمیان بڑھتا ہوا تعاون نہ صرف عوام کے مفاد میں ہے بلکہ خطے میں امن و استحکام کے لیے بھی سودمند ثابت ہوگا۔
وزارتِ دفاع کے دورے کے موقع پر فیلڈ مارشل عاصم منیر کو گارڈ آف آنر پیش کیا گیا۔ انہوں نے گمنام سپاہیوں کی یادگار اور سابق مصری صدر محمد انور السادات کی قبر پر پھول چڑھائے اور فاتحہ خوانی کی۔
چیف آف آرمی اسٹاف نے جامعہ الازہر کے شیخ اعظم، شیخ احمد الطیب سے بھی ملاقات کی۔ اس موقع پر شیخ الازہر نے مسلم دنیا کو درپیش چیلنجز پر اظہارِ خیال کیا، جب کہ فیلڈ مارشل عاصم منیر نے انتہا پسندی اور اسلام کی غلط تعبیرات کے خاتمے کی ضرورت پر زور دیا۔
دونوں رہنماؤں نے اس بات پر اتفاق کیا کہ مذہبی رواداری، تعلیم اور امن کے فروغ کے لیے باہمی تعاون کو مزید مستحکم بنایا جائے گا۔
