اردوورلڈکینیڈا( ویب نیوز)وفاقی وزیر خزانہ محمد اورنگزیب نے کہا ہے کہ رواں سال سیلاب کے اثرات کے باعث 4 فیصد اقتصادی ترقی کا ہدف حاصل کرنا مشکل ہوسکتا ہے۔
چینی میڈیا کو دیے گئے ایک انٹرویو میں وزیر خزانہ نے بتایا کہ پاکستان نے معیشت کے استحکام کی جانب اہم پیش رفت کی ہے۔ زرمبادلہ کے ذخائر میں بہتری آئی ہے، مہنگائی میں کمی ہوئی ہے اور پالیسی ریٹ بھی کم کیا گیا ہے۔ ان کے مطابق موجودہ ذخائر ڈھائی ماہ کی درآمدات کے لیے کافی ہیں۔
محمد اورنگزیب نے کہا کہ افراطِ زر اب سنگل ڈیجٹ میں آچکی ہے اور عالمی اداروں نے پاکستان کی معاشی کارکردگی کو مثبت قرار دیا ہے۔ تین بین الاقوامی ریٹنگ ایجنسیوں نے پاکستان کی کریڈٹ ریٹنگ میں بہتری کی ہے۔
انہوں نے مزید کہا کہ گزشتہ مالی سال میں ملکی جی ڈی پی میں 3 فیصد اضافہ ہوا جبکہ رواں سال 4 فیصد سے زائد ترقی کا ہدف مقرر تھا، تاہم سیلاب سے اس پر کچھ اثر پڑ سکتا ہے۔ اس کے باوجود حکومت کو امید ہے کہ معیشت 3.5 فیصد کی شرح نمو حاصل کرلے گی۔
وزیر خزانہ کے مطابق سی پیک کے دوسرے مرحلے میں نمایاں پیش رفت ہوئی ہے اور چین کے ساتھ سرمایہ کاری کے نئے مواقع پر غور کیا جا رہا ہے۔
