اردوورلڈ کینیڈا( ویب نیوز)سکردو میں ریچھ کے حملے کا شکار ہونے والی گلوکارہ قرۃ العین بلوچ کی ٹیم نے ان کی صحت کے بارے میں پہلا باضابطہ بیان جاری کر دیا ہے۔

بیان کے مطابق، قرۃ العین بلوچ حال ہی میں بلتستان کے سیلاب متاثرین کی بحالی کے لیے کام کرنے گئی تھیں، جہاں وہ جامع ڈیزاسٹر ریسپانس سروسز (CDRS) کے ساتھ متاثرہ دیہات میں امدادی سرگرمیوں میں شریک تھیں۔

4 ستمبر کی رات دوران قیام، خیمے میں موجودگی کے دوران ان پر بھورے ریچھ نے حملہ کیا، تاہم CDRS ٹیم نے فوری کارروائی کرتے ہوئے ریچھ کو بھگا دیا۔

قرۃ العین کو فوری طور پر قریبی طبی مرکز منتقل کیا گیا، جہاں ڈاکٹروں نے تصدیق کی کہ ان کی حالت خطرے سے باہر ہے اور کوئی فریکچر نہیں ہوا۔ گلوکارہ تیزی سے صحت یاب ہو رہی ہیں۔

ٹیم نے مداحوں سے اپیل کی ہے کہ وہ دعا کریں اور اس دوران ان کی پرائیویسی کا احترام کریں، کیونکہ قرۃ العین کو مکمل آرام کی ضرورت ہے۔ تمام عوامی سرگرمیاں ان کی صحت یابی تک ملتوی کر دی گئی ہیں۔