اردو ورلڈ کینیڈا ( بیورو رپورٹ ) کینیڈا کی ورلڈ جونیئر ہاکی ٹیم کے پانچ سابق کھلاڑیوں کو جنسی زیادتی کے مقدمے میں عدالت نے بری کر دیا ہے۔

فیصلہ اونٹاریو سپیریئر کورٹ کی جسٹس ماریا کاروسیا نے سنایا، جس کے بعد تمام ملزمان عدالت سے اہل خانہ کے ہمراہ باہر آ گئے۔ بری ہونے والے کھلاڑیوں کے نام درج ذیل ہیں،* مائیکل میکلیوڈ،* کارٹر ہارٹ،ایلکس فورمنٹن، ڈیلن ڈوبے، کالن فوٹ شامل ہیں ،میکلیوڈ پر ایک اضافی الزام بھی تھا کہ وہ اس واقعے میں دوسرے افراد کے ساتھ مل کر شریک ہوئے، تاہم وہ اس الزام سے بھی بری ہو گئے۔
عدالتی فیصلے کی تفصیل
جسٹس کاروسیا نے اپنے فیصلے میں کہا کہ متاثرہ خاتون کی گواہی نہ تو قابلِ اعتبار تھی اور نہ ہی قابلِ بھروسہ۔ انہوں نے کہا کہ شکایات میں تضادات موجود تھے اور متاثرہ خاتون نے بعض باتوں کی ذمہ داری دوسروں پر ڈالنے کی کوشش کی۔انہوں نے "اس کی سچائی” جیسے الفاظ کا حوالہ دیتے ہوئے کہا کہ یہ اصل حقیقت اور ذاتی عقیدے کے درمیان لکیر کو دھندلا کرتا ہے۔
متاثرہ خاتون کا ردِعمل
خاتون کی وکیل، کرن بیلہیومر، نے عدالت کے باہر صحافیوں سے بات کرتے ہوئے کہا، "وہ بہت مایوس ہے۔ اُس نے نظام انصاف کے تمام تقاضے پورے کیے، لیکن یہ کافی ثابت نہیں ہوا۔”
پراسیکیوشن اور دفاع کا مؤقف
پراسیکیوٹر میگھن کننگھم نے کہا کہ وہ فیصلے کا بغور جائزہ لیں گی اور پھر اپیل پر غور کیا جائے گا۔ انہوں نے کہا، "ایک منصفانہ مقدمہ صرف سزا سے نہیں بلکہ انصاف کے عمل سے ناپا جاتا ہے۔”دوسری جانب دفاعی وکلا نے اس فیصلے کو اپنے موکلوں کے لیے مکمل فتح قرار دیا۔ کارٹر ہارٹ کے وکیل میگن ساوارڈ نے کہا کہ مقدمہ غیر ضروری اور تکلیف دہ تھا، جبکہ ایلکس فورمنٹن کے وکیل ڈینیئل براؤن نے کہا کہ یہ انصاف کا تقاضا تھا اور اُن کے موکل کا مستقبل اب بحال ہو سکتا ہے۔
واقعے کی پس منظر
یہ واقعہ جون 2018 میں پیش آیا تھا جب گولڈ میڈل جیتنے کے بعد ٹیم کے کھلاڑی لندن، اونٹاریو میں جشن منا رہے تھے۔ متاثرہ خاتون نے مائیکل میکلیوڈ کے ساتھ رضامندی سے تعلق قائم کیا، جو مقدمے کا حصہ نہیں تھا۔الزام تھا کہ بعد میں دوسرے کھلاڑیوں کو اس کمرے میں بلایا گیا، جنہوں نے مبینہ طور پر خاتون کی رضامندی کے بغیر جنسی سرگرمی میں حصہ لیا۔
کیس کے اہم  نکات
استغاثہ کا دعویٰ تھا کہ میکلیوڈ نے جان بوجھ کر دوسرے کھلاڑیوں کو کمرے میں بلایا تاکہ وہ بھی خاتون کے ساتھ جنسی عمل کریں۔ دفاع کا مؤقف تھا کہ خاتون نے خود ان سرگرمیوں میں بڑھ چڑھ کر حصہ لیا اور بعد میں کہانی بدل دی۔ عدالت میں دو مختصر ویڈیوز پیش کی گئیں جن میں خاتون خود کہہ رہی تھیں کہ "سب کچھ رضامندی سے ہو رہا ہے۔” عدالت نے قرار دیا کہ خاتون کی نشے میں ہونے کی حالت کو بڑھا چڑھا کر پیش کیا گیا۔دو دیگر کھلاڑی، بریٹ ہاؤڈن اور ٹائلر اسٹینبرگن، نے گواہی دی کہ خاتون نے گروپ سے پوچھا تھا کہ کون اُس کے ساتھ جنسی عمل کرے گا۔ کارٹر ہارٹ نے بھی اس کی تصدیق کی۔
عدالتی کارروائی اور عوامی ردِعمل
ابتدائی طور پر مقدمہ جیوری کے ذریعے چلایا جا رہا تھا لیکن جیوری کو دو بار فارغ کرنے کے بعد اسے صرف جج کے ذریعے سنا گیا۔ مقدمے کے دوران متاثرہ خاتون نے الگ کمرے سے ویڈیو لنک کے ذریعے گواہی دی۔عدالتی فیصلے کے دن عدالت کے باہر دونوں اطراف کے مظاہرین موجود تھے، کچھ متاثرہ خاتون کی حمایت میں اور کچھ ہاکی کھلاڑیوں کی حمایت میں۔
ہاکی کینیڈا کا مؤقف
ہاکی کینیڈا نے کہا ہے کہ پانچوں کھلاڑی اب بھی تنظیم کی تمام سرگرمیوں سے معطل ہیں۔ ایک آزاد اپیل بورڈ نے اس وقت ان کے خلاف ضابطہ اخلاق کی خلاف ورزی پر کارروائی روک دی تھی اور اب فیصلے کے بعد دوبارہ کارروائی کی تاریخ مقرر کی جائے گی۔