اردوورلڈ کینیڈا( ویب نیوز)ایرانی اور اسرائیلی حکومتوں کے آفیشل جنگ بندی کے اعلان کے بعد خلیج فارس میں صورتحال میں بہتری آئی ہے، جس کے نتیجے میں پاکستان انٹرنیشنل ایئرلائن (PIA) کی فضائی پروازیں دوبارہ شروع ہو گئی ہیں۔
PIA نے پاکستان سے قطر، بحرین، کویت اور دبئی کے لیے اپنی فلائٹ آپریشنز بحال کر دیے ہیں۔
خلیج کے ممالک میں جاری جنگ کی وجہ سے پروازیں معطل کی گئی تھیں، تاہم حالات معمول پر آنے کے بعد PIA نے پروازوں کی بحالی کا اعلان کیا۔
PIA کے ترجمان کے مطابق مسافروں سے گزارش ہے کہ اپنی پروازوں سے متعلق بروقت معلومات کے لیے PIA کے کال سینٹر سے رابطہ کریں۔ PIA کے ریزرویشن ڈیپارٹمنٹ نے ایک عمل شروع کر دیا ہے جس میں مسافروں کی بکنگز کو دوسری پروازوں میں منتقل کیا جا رہا ہے۔
ہم پروازوں کی منسوخی کے باعث ہونے والی تکالیف پر معذرت خواہ ہیں، لیکن مسافروں کی سلامتی سب سے مقدم ہے۔
بحال ہونے کے بعد پروازیں 4 سے 13 گھنٹے تاخیر کا شکار ہیں۔ کراچی، لاہور اور اسلام آباد کے مختلف ہوائی اڈوں سے روانہ ہونے والی 55 پروازیں تاخیر کا سامنا کر رہی ہیں، جبکہ کراچی، لاہور، اسلام آباد، پشاور اور سیالکوٹ سے پروازیں کرنے والی 14 غیر ملکی ایئرلائنز کی پروازیں بھی متاثر ہوئی ہیں۔
کراچی سے جدہ، دوحہ اور استنبول کے لیے 8 پروازیں منسوخ کی گئی تھیں۔ ایک غیر ملکی ایئرلائن کی کراچی سے دبئی کے لیے 2 پروازیں منسوخ ہوئیں، جبکہ لاہور سے شارجہ، مسقط اور ریاض کے لیے 5 پروازیں منسوخ کر دی گئیں۔
لاہور سے مدینہ جانے والی قومی ایئرلائن کی پرواز PK-747 میں 13 گھنٹے تاخیر ہوئی، دوحہ سے کراچی اور پھر لاہور جانے والی غیر ملکی ایئرلائن کی پرواز میں 10 گھنٹے تاخیر ہے، اسلام آباد سے دبئی جانے والی قومی ایئرلائن PK-233 کی پرواز 15 گھنٹے تاخیر کا شکار ہے، اور بحرين سے اسلام آباد آنے والی 2 پروازیں 4 گھنٹے لیٹ ہو رہی ہیں۔
