اردوورلڈ کینیڈا( ویب نیوز)گلگت بلتستان، بلوچستان اور سندھ سمیت ملک کے مختلف علاقوں میں بارش کے باعث طغیانی کی صورتحال ہے۔
بلوچستان کے سیلاب سے متاثرہ علاقے زیارت میں بارشوں کے بعد سیلاب سے 3 یونین کونسل زندارہ، کواس اور مانڑہ متاثر ہوئے ہیں۔
مسلم باغ میں متاثرہ قومی شاہراہ این 50 پر ٹریفک کی جزوی طور پر آمدورفت بحال کردی گئی جب کہ خیبرپختونخوا اور پنجاب کو ملانے والی این 50، زیارت اور کوئٹہ شاہراہیں کئی مقامات پر طغیانی کے باعث تاحال متاثر ہیں۔
دریں اثناء صحاب پور کی مانجھوتی برانچ اور شاہی کینال میں پڑنے والے شگاف کو 6 روز گزرنے کے باوجود ٹھیک نہیں کیا جا سکا۔ نصیر کھوسہ، مولوی قادر بخش اور علی آباد سمیت درجنوں دیہات زیر آب آگئے ہیں۔
کشمور میں گڈو بیراج پر درمیانے درجے کا سیلابی صورتحال برقرار ہے، بنجر علاقوں میں پانی داخل ہونے سے فصلیں زیر آب آ گئیں۔
دوسری جانب گلگت بلتستان کے دریاؤں اور ندی نالوں میں طغیانی کا سلسلہ رک گیا ہے۔ انتظامیہ کے مطابق سیلاب سے 10 مواصلاتی پل اور 75 مکانات کو شدید نقصان پہنچا۔ سیلاب سے متاثرہ علاقوں میں بحالی کا کام جاری ہے۔