اردو ورلڈ کینیڈا ( ویب نیوز )لاہور میں دو ماہ میں مسلسل آٹھویں مرتبہ آٹے کی قیمت میں اضافہ کردیا گیا، آٹا دس روپے مہنگا ہوگیا۔
مل اونرز ایسوسی ایشن کی جانب سے جاری کردہ نئی ریٹ لسٹ کے مطابق مل آٹے کی قیمت میں 10 روپے فی کلو اضافہ کیا گیا ہے جس کے بعد آٹے کی قیمت 160 روپے فی کلو ہوگئی ہے۔
مارکیٹ ذرائع کے مطابق فلور مل مالکان نے 2 ماہ میں مسلسل 8ویں بار قیمت میں اضافہ کیا ہے، باریک آٹے کی 40 کلو کی بوری 12 ہزار 600 روپے ہو گئی ہے جبکہ 15 کلو آٹے کا کمرشل تھیلا 2 ہزار 150 روپے میں فروخت ہو رہا ہے۔
اس کے علاوہ مرغی کے گوشت اور انڈوں کی قیمت میں بھی اضافہ کیا گیا ہے جس سے انڈوں کی قیمت 280 روپے فی درجن ہو گئی ہے۔
مارکیٹ ذرائع کے مطابق مرغی کے گوشت کی سرکاری قیمت 574 روپے فی کلو تک پہنچ گئی ہے اور بعض دکاندار مرغی کا گوشت 620 روپے فی کلو فروخت کر رہے ہیں۔
دوسری جانب کوئٹہ میں مرغی کے گوشت کی قیمت میں 20 روپے کا اضافہ ہوا ہے جس سے یہ 620 روپے فی کلو ہو گئی ہے۔
کوئٹہ میں رواں ہفتے کے دوران مرغی کے گوشت کی قیمت میں پانچویں مرتبہ اضافہ کردیا گیا، رواں ہفتے کے آغاز پر مرغی کا گوشت 520 روپے میں فروخت ہورہا تھا۔
اس کے علاوہ کراچی کے بعض علاقوں میں مرغی کا گوشت 580 اور 600 روپے میں فروخت ہو رہا ہے۔
