اردوورلڈ کینیڈا( ویب نیوز)ا کینیڈا کے صوبے البرٹا کی فوٹ ہلز کاؤنٹی میں ایک خوراک تیار کرنے والی سہولت پر اچانک بیماری پھیلنے کی اطلاع ملی ہے، جس کے بارے میں شبہ ظاہر کیا جا رہا ہے کہ یہ ای کولی بیکٹیریا یا کسی پیراسائٹ (انسانی آنتوں میں پایا جانے والا کیڑا) کے باعث ہوا ہے۔
البرٹا ہیلتھ سروسز کے مطابق اس خوراکی سہولت سے منسلک متعدد افراد میں متلی، قے، دست اور پیٹ درد جیسی علامات سامنے آئی ہیں۔
متاثرین میں کچھ ملازمین اور چند ایسے افراد شامل ہیں جنہوں نے حالیہ دنوں میں وہاں سے تیار کردہ خوراک استعمال کی۔
ابتدائی طور پر ماہرین صحت کا کہنا ہے کہ یہ ای کولی یا آنتوں کا پیراسائٹ ہو سکتا ہے، تاہم حتمی تصدیق لیبارٹری رپورٹس کے بعد ہی کی جائے گی۔
حکام نے احتیاطی تدابیر کے طور پر اس سہولت سے متعلق تمام خوراکی مصنوعات مارکیٹ سے واپس منگوانے کا عمل شروع کر دیا ہے۔
عوام سے اپیل کی گئی ہے کہ اگر کسی نے حالیہ دنوں میں وہاں کی کوئی خوراک خریدی ہے تو فوری طور پر اس کا استعمال ترک کریں۔البرٹا ہیلتھ سروسز کا کہنا ہے کہ متاثرہ افراد کو طبی سہولیات دی جا رہی ہیں اور وبا پر قابو پانے کے لیے ہنگامی اقدامات کیے جا رہے ہیں۔
مزید تحقیقات جاری ہیں۔
