اردوورلڈ کینیڈا ( ویب نیوز)پہلے ٹی ٹوئنٹی میچ میں پاکستان کو شکست دے کر افغانستان نے کرکٹ کے مختصر ترین فارمیٹ کی تاریخ میں گرین شرٹس کے خلاف پہلی فتح پر مہر ثبت کر دی۔

شارجہ کرکٹ اسٹیڈیم میں کھیلے گئے پہلے ٹی ٹوئنٹی میچ میں افغانستان نے پاکستان کو 6 وکٹوں سے شکست دے کر تین میچوں کی ٹی ٹوئنٹی سیریز کا فاتحانہ آغاز کیا۔ ٹی ٹونٹی کرکٹ کی تاریخ میں پہلی بار افغانستان کے ہاتھوں شکست ہوئی۔
افغانستان کی جانب سے رحمان اللہ گرباز نے 16 رنز بنائے، ابراہیم 9 رنز بنا کر آؤٹ ہوئے، کریم جنت نے 7 اور محمد نبی نے 38 رنز کی اننگز کھیلی۔
اس سے قبل پاکستان نے پہلے کھیلتے ہوئے مقررہ 20 اوورز میں 9 وکٹوں پر 92 رنز بنائے اور افغانستان کو جیت کے لیے 93 رنز کا ہدف دیا۔
پاکستان کی جانب سے صائم ایوب 17، محمد حارث 6 اور عبداللہ شفیق بغیر کوئی رن بنائے آؤٹ ہوئے جب کہ طیب طاہر 16، شاداب خان 12 اور عماد وسیم نے 18 رنز کی اننگز کھیلی۔
افغانستان کی جانب سے فضل الحق فاروقی، مجیب الرحمان اور محمد نبی نے 2،2 وکٹیں حاصل کیں جب کہ محمد نبی کو عمدہ کارکردگی پر میچ کا بہترین کھلاڑی قرار دیا گیا۔