اردو ورلڈ کینیڈا ( ویب نیوز ) برطانیہ کے بادشاہ King Charles III کے بھائی اور سابق برطانوی شہزادے Prince Andrew, Duke of York کو مختصر حراست کے بعد رہا کر دیا گیا ہے
۔ برطانوی میڈیا رپورٹس کے مطابق اینڈریو ماؤنٹ بیٹن ونزر کو صبح کے وقت گرفتار کیا گیا تھا تاہم بعد ازاں قانونی تقاضے پورے کرنے کے بعد انہیں رہا کر دیا گیا۔
میڈیا رپورٹس کے مطابق اینڈریو کی گاڑی کو تھانے سے نکلتے ہوئے دیکھا گیا، جس میں وہ پچھلی نشست پر بیٹھے ہوئے تھے۔ پولیس ذرائع کا کہنا ہے کہ انہیں کمسنوں سے جنسی تعلقات کے مجرم امریکی سرمایہ کار Jeffrey Epstein سے مبینہ روابط اور ایک خفیہ سرکاری دستاویز کی فراہمی کے شبہے میں تحویل میں لیا گیا تھا۔
پولیس حکام کے مطابق سابق شہزادے کو عام شہری کی طرح حراست میں رکھا گیا اور انہیں کسی قسم کا خصوصی استثنیٰ حاصل نہیں تھا۔ کراؤن پراسیکیوشن سروس کے مطابق زیرِ تفتیش جرم کی زیادہ سے زیادہ سزا عمر قید ہوسکتی ہے، تاہم قانونی ماہرین کا کہنا ہے کہ موجودہ کیس میں عمر قید کی سزا کا امکان کم دکھائی دیتا ہے۔
برطانوی میڈیا کا یہ بھی کہنا ہے کہ گرفتاری سے قبل نہ تو بادشاہ چارلس کو آگاہ کیا گیا اور نہ ہی بکنگھم پیلس کو باضابطہ اطلاع دی گئی۔ شاہی خاندان کے ایک فرد کی حیثیت سے اینڈریو کی گرفتاری نے سیاسی اور سماجی حلقوں میں ہلچل مچا دی ہے۔
یاد رہے کہ پرنس اینڈریو ماضی میں بھی جیفری ایپسٹین اسکینڈل کے باعث شدید تنقید کی زد میں رہے ہیں اور 2019 میں عوامی دباؤ کے بعد انہوں نے شاہی فرائض سے دستبرداری اختیار کرلی تھی۔ حالیہ پیش رفت کے بعد ایک بار پھر شاہی خاندان کی ساکھ اور احتساب کے نظام پر سوالات اٹھائے جا رہے ہیں۔برطانوی حکام کا کہنا ہے کہ تفتیش جاری ہے اور آئندہ دنوں میں مزید قانونی پیش رفت متوقع ہے۔
