اردوورلڈکینیڈا( ویب نیوز)اسلام آباد ایئرپورٹ پر عوامی مسلم لیگ کے سربراہ شیخ رشید احمد کو عمرہ کی ادائیگی کے لیے سعودی عرب روانگی سے روک دیا گیا۔
شیخ رشید کے مطابق، انہیں اس وقت روکا گیا جب وہ عدالت کی اجازت کے بعد ایئرپورٹ پہنچے۔ انہوں نے کہا کہ لاہور ہائی کورٹ راولپنڈی بینچ کے جسٹس صداقت علی خان نے ان کے عمرہ پر جانے کی اجازت دی تھی اور عدالتی حکم کی مصدقہ کاپی متعلقہ اداروں کو فراہم کر دی گئی تھی، تاہم اس کے باوجود ایئرپورٹ حکام نے انہیں سفر سے روک دیا۔
شیخ رشید کا کہنا تھا کہ عدالت نے واضح ہدایت دی تھی کہ ان کے سفر میں کوئی رکاوٹ نہ ڈالی جائے، لیکن ایئرپورٹ پر موجود دو افسران، عابد اور توقیر، نے انہیں بتایا کہ وہ سفر نہیں کر سکتے اور عدالت کا حکم ماننے سے انکار کر دیا۔
انہوں نے کہا، “جس ملک میں عدالت کے فیصلے پر عمل نہ ہو، وہاں انسان کو بس اللہ ہی کی طرف دیکھنا چاہیے۔ اللہ ہی مجھے عمرہ کرائے گا اور جنہوں نے یہ اقدام کیا، انہیں اپنے فیصلے پر شرمندگی ہوگی۔”
شیخ رشید نے مزید کہا کہ وہ اس معاملے پر توہینِ عدالت کی درخواست دائر کریں گے تاکہ عدالتی حکم کی خلاف ورزی کا جواب طلب کیا جا سکے۔
