اردوورلڈ کینیڈا( ویب نیوز)پاکستان تحریک انصاف کے رہنما حماد اظہر کے والد اور سابق گورنر پنجاب میاں محمد اظہر طویل علالت کے بعد لاہور میں انتقال کر گئے۔
خاندانی ذرائع کے مطابق وہ کافی عرصے سے بیمار اور زیر علاج تھے۔میاں محمد اظہر کا شمار پاکستان کے بزرگ اور سینئر سیاستدانوں میں ہوتا تھا۔ انہوں نے نہ صرف پنجاب کے گورنر کی حیثیت سے خدمات انجام دیں بلکہ 2024 کے عام انتخابات میں قومی اسمبلی کے حلقہ این اے 129 سے آزاد حیثیت میں کامیابی حاصل کرنے کے بعد سنی اتحاد کونسل میں شمولیت اختیار کی۔
ان کی انتخابی مہم کو پاکستان تحریک انصاف کی حمایت حاصل تھی۔سیاسی کیریئر کے آخری ایام میں وہ پاکستان تحریک انصاف کے وفادار حامیوں میں شمار ہوتے تھے۔ انہوں نے متعدد ادوار میں مختلف سیاسی مناصب پر خدمات انجام دیں اور ملکی سیاست میں اہم کردار ادا کیا۔
جون 2023 میں ان کے بیٹے حماد اظہر نے دعویٰ کیا تھا کہ ان کے 88 سالہ والد کو پولیس نے حراست میں لے کر نامعلوم مقام پر منتقل کر دیا تھا، تاہم دو روز بعد ان کی گھر واپسی کی تصدیق کی گئی تھی۔میاں محمد اظہر کے انتقال پر وزیراعلیٰ پنجاب مریم نواز شریف نے اظہار افسوس کرتے ہوئے سوگوار خاندان سے تعزیت اور ہمدردی کا اظہار کیا ہے۔ انہوں نے مرحوم کی سیاسی خدمات کو سراہتے ہوئے ان کے لیے دعائے مغفرت کی۔
