اردوورلڈ کینیڈا( ویب نیوز)سابق ڈی جی آئی ایس آئی لیفٹیننٹ جنرل (ر) فیض حمید کے خلاف کورٹ مارشل کی کارروائی کا اگلا مرحلہ شروع ہو گیا ہے۔.
فوجی ترجمان کے مطابق 12 اگست 2024 کو پاکستان آرمی ایکٹ کی متعلقہ دفعات کے تحت لیفٹیننٹ جنرل (ر) فیض حمید کے خلاف فیلڈ جنرل کورٹ مارشل کی کارروائی شروع کی گئی۔ فیلڈ جنرل کورٹ مارشل کے اگلے مرحلے میں لیفٹیننٹ جنرل (ر) فیض حمید پر باضابطہ چارج شیٹ کی گئی ہے۔.
آئی ایس پی آر نے کہا کہ ان الزامات میں سیاسی سرگرمیوں میں ملوث ہونا، آفیشل سیکرٹ ایکٹ کی خلاف ورزی کرکے ریاست کی سلامتی اور مفادات کو نقصان پہنچانا، اختیارات اور سرکاری وسائل کا غلط استعمال اور افراد کو غیر ضروری نقصان پہنچانا شامل ہے۔.
پاک فوج کے محکمہ تعلقات عامہ نے کہا ہے کہ فیلڈ جنرل کورٹ مارشل کے عمل کے دوران ملک میں افراتفری اور بدامنی سے متعلق پرتشدد واقعات میں لیفٹیننٹ جنرل (ر) فیض حمید کے ملوث ہونے کی الگ تحقیقات بھی کی جا رہی ہیں۔. تشدد اور بدامنی کے کئی واقعات کی تحقیقات کی جا رہی ہیں جن میں 9 مئی سے متعلق واقعات بھی شامل ہیں۔.
آئی ایس پی آر نے مزید کہا کہ ان متعدد پرتشدد واقعات میں مذموم سیاسی عناصر کے ملوث ہونے اور ان کی ملی بھگت کی تحقیقات جاری ہیں۔. فیلڈ جنرل کورٹ مارشل کے عمل کے دوران لیفٹیننٹ جنرل (ر) فیض حمید کو قانون کے مطابق تمام قانونی حقوق فراہم کیے جا رہے ہیں۔.
