اردو ورلڈ کینیڈا ( ویب نیوز ) امریکہ میں صدارتی انتخابات کی تیاریاں ، انتخابی مہم عروج پر سابق امریکی صدر اور ریپبلکن صدارتی امیدوار ڈونلڈ ٹرمپ نے ڈیموکریٹک امیدوار کملا ہیرس کے ساتھ ایک اور مباحثے سے انکار کر دیا ہے۔سوشل میڈیا پر ایک بیان میں ڈونلڈ ٹرمپ نے کہا کہ وہ کملا ہیرس کے ساتھ کسی اور مباحثے میں حصہ نہیں لیں گے۔انہوں نے کہا کہ ان کی ایک بحث بائیڈن سے ہوئی اور دوسری کملا ہیرس سے، تیسری بحث نہیں ہوگی۔
یاد رہے کہ دو روز قبل ری پبلکن پارٹی کے صدارتی امیدوار اور سابق امریکی صدر ڈونلڈ ٹرمپ اور ڈیموکریٹک پارٹی کے صدارتی امیدوار اور موجودہ نائب صدر کملا ہیرس کے درمیان پہلا مباحثہ ہوا تھا۔امریکی نشریاتی ادارے اے بی سی نیوز کے زیر اہتمام مباحثہ ریاست پنسلوانیا میں ہوا، دونوں امیدواروں کے درمیان بحث 90 منٹ تک جاری رہی۔مباحثے میں دونوں جماعتوں کے امیدواروں نے معیشت، امیگریشن، اسقاط حمل، روس یوکرین جنگ اور غزہ پر اسرائیل کے حملوں سمیت اہم ملکی اور غیر ملکی مسائل پر اپنے اپنے موقف پیش کئے۔مباحثے کے دوران دونوں امیدواروں نے ایک دوسرے پر الزامات کی بوچھاڑ کی، زیادہ تر مبصرین کا کہنا تھا کہ کملا ہیرس نے مباحثے میں ڈونلڈ ٹرمپ کو شکست دی تھی، تاہم کچھ کا خیال کچھ اور تھا۔
