اردوورلڈ کینیڈا( ویب نیوز)خضدار میں قومی شاہراہ پر زیرو پوائنٹ کے قریب دھماکے سے چار بچے جاں بحق اور متعدد زخمی ہوگئے۔ ڈپٹی کمشنر خضدار نے دھماکے کی تصدیق کرتے ہوئے کہا کہ خضدار میں زیرو پوائنٹ کے قریب دھماکے کے نتیجے میں ایک اسکول بس تباہ ہوگئی۔
سکول بس میں سوار چار بچے جاں بحق اور 38 زخمی بچوں کو علاج کے لیے ہسپتال منتقل کر دیا گیا ہے۔پولیس حکام کے مطابق دھماکے میں بس کو شدید نقصان پہنچا تاہم پولیس اور سکیورٹی فورسز جائے وقوعہ پر پہنچ گئی ہیں اور علاقے میں سرچ آپریشن شروع کر دیا گیا ہے۔
.واضح رہے کہ حالیہ دنوں میں بلوچستان میں بھارتی سرپرستی میں دہشت گردی میں اضافہ ہو رہا ہے۔ کالعدم تنظیموں کے دہشت گرد بے گناہ شہریوں کو نشانہ بنانے کے لیے اپنی کارروائیاں تیز کرنے کی کوشش کر رہے ہیں تاہم سکیورٹی فورسز نے ان کے کئی حملوں کو ناکام بنا دیا ہے۔
دریں اثنا، وزیر داخلہ محسن نقوی نے خضدار دھماکے کی مذمت کرتے ہوئے کہا کہ بے گناہ بچوں کو نشانہ بنانے والے درندے کسی رعایت کے مستحق نہیں ہیں ہماری ہمدردیاں متاثرہ خاندانوں سے ہیں۔
محسن نقوی نے کہا ہے کہ دشمن نے بربریت کا مظاہرہ کیا اور معصوم بچوں پر حملہ کیا۔سکول بس پر حملہ ملک میں عدم استحکام پیدا کرنے کے لیے دشمن کی گھناؤنی سازش ہے۔
قوم کے اتحاد سے ہر سازش ناکام ہو جائے گی وزیر داخلہ نے مزید کہا کہ ہم مرنے والے بچوں کے سوگوار خاندانوں کے ساتھ کھڑے ہیں۔. ہماری تمام ہمدردیاں مرنے والے بچوں اور زخمیوں کے اہل خانہ کے ساتھ ہیں اور ہم زخمیوں کی جلد صحت یابی کے لیے دعا کرتے ہیں ۔
