اردو ورلڈ کینیڈا ( ویب نیوز ) جرمنی کے شہر فرینکفرٹ میں افغان شہریوں کی جانب سے پاکستانی قونصل خانے پر پتھراؤ اور پاکستانی پرچم اتارنے کا افسوسناک واقعہ بھی پیش آیا۔پاکستانی سفارتی حکام نے جرمن وزارت خارجہ سے احتجاج کرتے ہوئے فرینکفرٹ میں پیش آنے والے افسوسناک واقعے کی تحقیقات کا مطالبہ کیا ہے۔میڈیا رپورٹس کے مطابق فرینکفرٹ میں احتجاج کے دوران افغان شہریوں نے پاکستانی قونصلیٹ پر دھاوا بول دیا، پتھراؤ کیا اور پاکستانی پرچم بھی اتار دیا، جس کی ویڈیو بھی سوشل میڈیا پر وائرل ہو رہی ہے۔
اطلاعات کے مطابق افغان شہریوں نے پاکستانی پرچم جلانے کی کوشش بھی کی ۔پاکستانی حکام کا کہنا تھا کہ غیر ملکی سفارتی تنصیبات کی سیکیورٹی کی ذمہ داری جرمن حکومت کی ہے اور اس معاملے پر عالمی برادری کو بھی سفارتی تنصیبات کی سیکیورٹی کے معاملے پر تشویش ہے۔فرینکفرٹ میں جرمن حکام کی جانب سے پاکستانی سفارتی حکام کو مکمل تحقیقات کی یقین دہانی کرائی گئی ہے۔دوسری جانب غیر ملکی میڈیا کا کہنا ہے کہ اس معاملے کی ویڈیو سوشل میڈیا پر وائرل ہونے کے بعد جرمن حکام نے متعدد افراد کو گرفتار بھی کیا ہے جن سے تفتیش جاری ہے۔
