اردو ورلڈ کینیڈا ( ویب نیوز)پنجاب میں 18 سال سے زائد عمر کے شناختی کارڈ کے حامل ہر فرد کو مفت آٹا حاصل کرنے کا اہل قرار دے دیا گیا ہے۔

صوبے میں مفت آٹا فراہم کر کے صرف مستحق خاندانوں کو ٹارگٹ فوڈ سبسڈی فراہم کرنے کا نظام ختم کر دیا گیا ہے اور نئے نظام کے تحت 18 سال سے زائد عمر کے تمام افراد کو مفت آٹا فراہم کیا جائے گا جن کے پاس ان کے رہائشی پتے کی بنیاد پر شناختی کارڈ ہے۔

اس وقت بے نظیر انکم سپورٹ پروگرام میں رجسٹرڈ فیملی (اوسط 6 افراد) کو 3 بیگ فراہم کیے جا رہے ہیں جبکہ ایک غیر رجسٹرڈ فرد کو 1 بیگ مفت فراہم کیا جا رہا ہے  اس حوالے سے آج اسلام آباد میں وزیراعظم کی زیر صدارت اجلاس میں اہم فیصلے متوقع ہیں۔

رمضان المبارک میں پنجاب اور خیبر پختونخواہ کے ضرورت مندوں کو مفت آٹا فراہم کریں گے،شہباز شریف

گزشتہ روز تک 1 کروڑ 40 لاکھ تھیلے تقسیم کیے جا چکے ہیں تاہم مفت آٹے کی تقسیم کے طریقہ کار میں تبدیلی کے بعد پنجاب کی نگراں حکومت کا 4 کروڑ 74 لاکھ تھیلوں کی تقسیم کا ہدف عملی طور پر ختم ہو گیا ہے۔ نئے ابتدائی تخمینہ کے مطابق  مفت آٹے کے تھیلوں کی تعداد 8 کروڑ سے تجاوز کرنے کا امکان ہے۔

مفت آٹے کی مانگ میں بڑے اضافے کے بعد سرکاری گندم کا ذخیرہ کم ہونے کے باعث محکمہ خوراک پنجاب نے وفاقی حکومت سے پاسکو کے پاس موجود گندم سے 3 لاکھ ٹن مزید گندم فراہم کرنے کی درخواست کی ہے

واضح رہے کہ وزیر اعظم شہباز شریف کی خصوصی ہدایات پر نگراں پنجاب حکومت نے 60 ہزار ماہانہ سے کم آمدن والے 1 کروڑ 58 لاکھ مستحق خاندانوں کو 30 کلو مفت آٹا دینے کی سکیم شروع کی تھی۔