27
اردوورلڈکینیڈا( ویب نیوز)کوئٹہ ریلوے سٹیشن پر خودکش حملے کے شہداء کی نماز جنازہ کوئٹہ گیریژن میں ادا کر دی گئی۔
آرمی چیف جنرل سید عاصم منیر نے شہداء کی نماز جنازہ میں شرکت کی، وزیر داخلہ محسن نقوی، گورنر، وزیراعلیٰ بلوچستان اور دیگر صوبائی وزراء نے بھی شرکت کی۔
نماز جنازہ میں فوجی اور سول حکام کی بڑی تعداد نے بھی شرکت کی، آرمی چیف نے سی ایم ایچ کوئٹہ میں زخمیوں کی عیادت بھی کی، جنرل سید عاصم منیر نے دہشت گردی کے خاتمے کے لیے قومی عزم کا اعادہ کیا۔
آرمی چیف جنرل سید عاصم منیر نے کہا کہ دہشت گردی کو برداشت نہیں کیا جائے گا، دہشت گردی کے خاتمے کا مشن مشترکہ عزم کے ساتھ جاری رکھا جائے گا۔
جنرل سید عاصم منیر نے کہا کہ دہشت گردی کے خلاف جنگ میں تمام پاکستانیوں کی مضبوط حمایت کی ضرورت ہے۔
قبل ازیں آرمی چیف جنرل سید عاصم منیر کی کوئٹہ آمد پر کور کمانڈر بلوچستان نے ان کا استقبال کیا۔
