سعودی ولی عہد نے شوریٰ کونسل کے سالانہ اجلاس سے خطاب کرتے ہوئے کہا کہ وہ قطر کے ہر قدم پر اس کے ساتھ کھڑے ہیں۔انہوں نے مزید کہا کہ اس طرح کی جارحیت کا مقابلہ کرنے اور اسے روکنے کے لیے اقدامات کرنا ہوں گے، انہوں نے واضح کیا کہ غزہ فلسطینی سرزمین ہے اور کوئی جارحیت انہیں ان کے حقوق سے محروم نہیں کر سکتی۔

دریں اثنا متحدہ عرب امارات کے صدر شیخ محمد بن زاید النہیان اظہار یکجہتی کے لیے دوحہ پہنچے جہاں ائیرپورٹ پر قطر کے امیر شیخ تمیم بن حمد الثانی نے ان کا استقبال کیا۔قطر کے وزیراعظم نے کہا کہ دوحہ پر حملہ اسرائیلی ریاستی دہشت گردی کی کارروائی ہے جس کا جواب دینے کا حق رکھتے ہیں۔انہوں نے کہا کہ اسرائیلی حملے نے یرغمالیوں کی رہائی کی تمام امیدیں ختم کر دی ہیں، نیتن یاہو کو انصاف کے کٹہرے میں لانے کا مطالبہ کیا ہے۔ مصری صدر عبدالفتاح السیسی اور اردن کے شاہ عبداللہ دوم نے بھی قطر کے ساتھ مکمل یکجہتی کا اعادہ کیا۔یاد رہے کہ ایک روز قبل اسرائیل نے قطری دارالحکومت دوحہ میں حماس کی قیادت پر حملہ کیا تھا۔ اس حملے میں حماس کے سینئر رہنما خلیل الحیا کے بیٹے اور ان کے دفتر کے ڈائریکٹر سمیت چھ افراد شہید ہو گئے تھے۔ تاہم اس حملے میں حماس کی قیادت محفوظ رہی۔