اردوورلڈ کینیڈا( ویب نیوز)وزیر دفاع خواجہ محمد آصف نے کہا ہے کہ سابق وزیر ہوا بازی غلام سرور خان کے غیر ذمہ دارانہ بیان سے قومی ایئرلائن پی آئی اے کو اربوں روپے کا نقصان پہنچا اور قومی وقار مجروح ہوا۔ انہوں نے کہا کہ پی ٹی آئی کے دور حکومت میں غلام سرور خان کے بیان کی وجہ سے پی آئی اے پر برطانیہ اور یورپ میں پروازوں پر پابندی عائد ہوئی تھی۔

خواجہ آصف نے کہا کہ اب پی آئی اے کی پروازوں پر عائد پابندی ختم ہو گئی ہے، جس سے قومی ایئرلائن کی نجکاری کے عمل میں بہتری آئے گی۔ انہوں نے کہا کہ پی آئی اے کی یورپ اور برطانیہ کے لیے پروازیں جلد شروع ہوں گی، جس سے اوورسیز پاکستانیوں کو سہولت ملے گی۔ خواجہ آصف نے کہا کہ پی آئی اے کی بحالی اور ترقی میں کئی افراد اور اداروں کی محنت شامل ہے، اور آج کا دن پوری قوم کے لیے ایک یادگار دن ہے۔