اردو ورلڈ کینیڈا ( ویب نیوز)گورنر سندھ کامران ٹیسوری نے کہا ہے کہ کراچی کے مسائل کے حل کے لیے سب نے مل کر کام کرنے پر اتفاق کیا ہے، پی ایس پی رہنما کراچی کے مسائل پر کام کررہے ہیں، کراچی سب کا دوست ہے۔ لیکن اس کا کوئی دوست نہیں ہے۔
گورنر سندھ کامران ٹیسوری متحدہ قومی موومنٹ (ایم کیو ایم) کے مختلف دھڑوں کو متحد کرنے اور پی ایس پی رہنماؤں سے ملاقات کے لیے پاکستان ہاؤس آئے
ملاقات کے بعد گورنر سندھ کامران ٹیسوری نے سربراہ پی ایس پی مصطفیٰ کمال کے ہمراہ نیوز کانفرنس کرتے ہوئے کہا کہ کراچی سب کے لیے کھڑا ہوا لیکن کوئی اس کے لیے کھڑا نہیں ہوا، کراچی میں پانی، بجلی اور گیس نہیں، ہم سب کیا کر رہے ہیں؟ ٹوٹی ہوئی سڑکیں، ابلتے گٹر، گندی گلیاں، کس چیز کی سزا مل رہی ہے، آپ بجلی، پانی نہیں دے سکتے، عزت تو دے سکتے ہیں۔
کامران ٹیسوری نے کہا کہ ہمیں ایک دوسرے کا ساتھ دینا ہے، کراچی کے لوگ ناراض ہیں کیونکہ ہم نے ان کے لیے کچھ نہیں کیا، پاکستان ہمارا ہے اور ہم کام کریں گے۔
اس موقع پر پاک سرزمین پارٹی کے سربراہ مصطفیٰ کمال نے کہا ہے کہ پاکستان انتہائی مشکل حالات سے گزر رہا ہے، کوئی ایک جماعت ملک کے مسائل حل نہیں کرسکتی، ملکی مفاد کے لیے ذاتی سیاست کو پس پشت ڈالنا ہوگا۔
مصطفیٰ کمال کا کہنا تھا کہ ایم کیو ایم سے براہ راست یا خفیہ بات نہیں ہوئی، گورنر سندھ ہمارے بھائی ہیں، ہم ان سے دو بار ملاقات کرچکے ہیں، گورنر نے کہا کہ کراچی کے لیے مل کر کام کرنا چاہیے ۔
