اردو ورلڈ کینیڈا ( ویب نیوز ) امریکی ریاست اوریگون میں قائم Oregon State University کے سائنس دانوں نے لوہے پر مبنی

ایک نیا نینو میٹیریل تیار کیا ہے جو کینسر کے خلیات کو اندر سے تباہ کرنے کی صلاحیت رکھتا ہے۔ محققین کے مطابق یہ جدید مادہ ٹیومر کے خلیے میں داخل ہو کر بیک وقت دو مختلف کیمیائی ردِعمل کو متحرک کرتا ہے، جس کے نتیجے میں کینسر سیل شدید آکسیڈیٹو تناؤ کا شکار ہو جاتا ہے جبکہ اردگرد موجود صحت مند ٹشوز محفوظ رہتے ہیں۔
یہ دریافت کیموڈائنامک تھراپی (CDT) کے میدان میں ایک اہم پیش رفت قرار دی جا رہی ہے۔ کینسر کے خلیات عام خلیات کے مقابلے میں زیادہ تیزابی ماحول رکھتے ہیں اور ان میں ہائیڈروجن پر آکسائیڈ کی مقدار بھی زیادہ ہوتی ہے۔ روایتی CDT انہی خصوصیات سے فائدہ اٹھاتے ہوئے ہائیڈروکسل ریڈیکلز پیدا کرتی ہے، جو ری ایکٹو آکسیجن اسپیشیز (ROS) کہلاتے ہیں۔یہ انتہائی متحرک مالیکیول خلیے کے اندر موجود چکنائیوں، پروٹینز اور ڈی این اے سے الیکٹران چھین کر انہیں نقصان پہنچاتے ہیں، جس سے کینسر سیل تباہ ہو جاتا ہے۔
تحقیقی ٹیم کی رکن اولیہ ٹیراٹولا کے مطابق موجودہ CDT ایجنٹس کی ایک بڑی کمزوری یہ ہے کہ وہ یا تو ہائیڈروکسل ریڈیکلز مؤثر انداز میں پیدا کرتے ہیں یا سنگلٹ آکسیجن، لیکن دونوں کو بیک وقت اور مسلسل پیدا نہیں کر پاتے۔ اسی وجہ سے اکثر ٹیومر مکمل طور پر ختم نہیں ہوتا بلکہ صرف جزوی طور پر سکڑتا ہے۔
ان خامیوں کو دور کرنے کے لیے محققین نے لوہے پر مبنی میٹل-آرگینک فریم ورک (MOF) سے تیار کردہ ایک نیا نینو ایجنٹ بنایا ہے۔ یہ جدید ساخت بیک وقت ہائیڈروکسل ریڈیکلز اور سنگلٹ آکسیجن دونوں پیدا کرنے کی صلاحیت رکھتی ہے، جس سے اس کی کینسر مخالف کارکردگی نمایاں طور پر بڑھ جاتی ہے۔
لیبارٹری تجربات میں اس MOF نینو میٹیریل نے مختلف کینسر سیل لائنز میں مضبوط زہریلا اثر دکھایا جبکہ غیر سرطانی خلیات کو کم سے کم نقصان پہنچایا۔ محققین کے مطابق یہ ہدفی (ٹارگٹڈ) طریقہ علاج مستقبل میں کینسر تھراپی کو زیادہ مؤثر اور کم مضر بنا سکتا ہے۔ماہرین کا کہنا ہے کہ اگر آئندہ مرحلوں میں جانوروں اور انسانی آزمائشوں میں بھی یہی نتائج برقرار رہے تو یہ نینو میٹیریل کینسر کے علاج میں ایک اہم سنگ میل ثابت ہو سکتا ہے۔