اردو ورلڈ کینیڈا ( ویب نیوز ) سعودی عرب میں انسانی وسائل اور سماجی ترقی کی وزارت نے اطلاع دی ہے کہ 2024 کے دوران نجی اداروں میں کام کرنے والے سعودی شہریوں کی تعداد میں 45 فیصد اضافہ ہوا ہے۔

سعودی میڈیا کے مطابق وزارت کی جانب سے جاری کردہ ایک بیان میں کہا گیا ہے کہ خواتین کو بااختیار بنانے کی کوششوں کا معاشی شراکت میں اضافہ پر نمایاں اثر پڑا ہے۔وزارت کی رپورٹ میں مزید کہا گیا ہے کہ گزشتہ سال شرح نمو میں اضافے کے باعث لیبر مارکیٹ 35.8 فیصد تک بڑھ گئی جس میں خواتین کا تناسب 43 فیصد تک بڑھ گیا۔

وزارت کی رپورٹ کے مطابق شہریوں کے روزگار میں نجی شعبے کا حصہ 50.5 فیصد رہا جب کہ سعودی عرب میں بے روزگاری کی شرح میں نمایاں کمی دیکھی گئی۔بیان میں کہا گیا ہے کہ گزشتہ سال نجی شعبے میں ملازمین کی تنخواہوں میں 45 فیصد اضافہ ہوا جس سے معیار زندگی بلند ہوا ہے۔سعودی عرب کی وزارت برائے انسانی وسائل اور سماجی ترقی نے مزید کہا کہ یہ سب کچھ ولی عہد شہزادہ محمد بن سلمان کے ویژن 2030 کی وجہ سے ممکن ہوا، جس سے مملکت میں انقلابی تبدیلیاں آئی ہیں۔