اردو ورلڈ کینیڈا ( ویب نیوز ) ہندوستا ن میں شادی کے موقع پر اکثر عجیب و غریب واقعات رونما ہوتے رہتے ہیں جس پر سوشل میڈیا صارفین بھی حیران اور پریشان رہتے ہیں۔ بھارتی ریاست اتر پردیش میں حال ہی میں ہونے والی ایک شادی ایئر کنڈیشنر کے قریب بیٹھنے کے تنازع پر میدان جنگ میں تبدیل ہو گئی۔یہ واقعہ اتر پردیش کے بلیا ضلع میں پیش آیا جہاں دولہا چندر جیسوال کی شادی میں مہمانوں کے درمیان ایئر کنڈیشنر کے پاس بیٹھنے کے تنازع پر جھگڑا ہوگیا۔ جھگڑا اس حد تک بڑھ گیا کہ حالات پر قابو پانے کے لیے پولیس کو بلانا پڑا۔لڑائی اور افراتفری کے بعد، دلہن نے رسموں سے انکار کر دیا۔
دولہا اور اس کے گھر والوں کی دلہن کو راضی کرنے کی کوششوں کے باوجود وہ اپنے فیصلے پر ڈٹی رہی۔دولہے کا کہنا تھا کہ اس کے اہل خانہ نے بغیر جہیز کے دلہن کی خوبیوں کی بنیاد پر شادی پر رضامندی ظاہر کی تھی۔ چٹابراگاؤں پولیس اسٹیشن کے سربراہ پرشانت چودھری نے اس بات کی تصدیق کی کہ دونوں فریقوں کے درمیان ثالثی کی کوششیں کی گئیں لیکن ناکام رہیں۔ .جس کے نتیجے میں شادی کی تقریب منسوخ کر دی گئی اور دونوں فریقین کو عوامی امن میں خلل ڈالنے پر دفعہ 151 کے تحت نوٹس جاری کر دیے گئے۔