مزاحمتی تنظیموں نے اسرائیلی فوج کے بٹالین کے ہیڈکوارٹر سے ہلاکتوں اور شیبا فارمز کے علاقے میں بٹالین پر ڈرون حملے کا دعویٰ بھی کیا ہے۔گزشتہ روز غزہ پر اسرائیلی بمباری کے جواب میں فلسطین کی مزاحمتی تحریک حماس کے عسکری ونگ القسام بریگیڈز نے لبنان سے اسرائیلی علاقے کریات شمونہ پر 12 راکٹ فائر کیے جس سے ہر طرف آگ لگ گئی۔
اس کے علاوہ لبنان کی مزاحمتی تنظیم حزب اللہ کی جانب سے اسرائیل کی 19 فوجی پوسٹوں پر حملے کیے گئے۔عرب میڈیا کے مطابق اسرائیلی فوج نے بیان جاری کیا ہے کہ غزہ کی پٹی میں زمینی کارروائیوں کے دوران اب تک 25 فوجی اہلکار ہلاک جب کہ 260 فوجی اہلکار شدید زخمی ہوئے ہیں۔اسرائیلی فوج کا کہنا ہے کہ اسرائیلی فضائیہ نے 150 پروازوں کی مدد سے زخمیوں کو غزہ کی پٹی سے نکالا۔
واضح رہے کہ غزہ میں اسرائیلی یرغمالیوں کی تعداد 241 ہو گئی ہے جب کہ 7 اکتوبر سے اب تک غزہ میں 338 اسرائیلی فوجی مارے جا چکے ہیں۔دوسری جانب لبنانی تنظیم حزب اللہ کے سربراہ حسن نصر اللہ نے کہا ہے کہ حزب اللہ الاقصیٰ طوفان آپریشن کے دوسرے دن سے اسرائیل کے خلاف جنگ میں حصہ لے رہی ہے، ہمارے حملے محدود لیکن موثر ہیں، اگر اسرائیل نے حزب اللہ پر جنگ مسلط کی تو اس کا خمیازہ بھگتنا پڑے گا۔
