اردوورلڈکینیڈا( ویب نیوز)محکمہ موسمیات نے بلوچستان کے خشک سالی سے متاثرہ علاقوں کے لیے خوشخبری سنائی ہے اور دسمبر میں گرج چمک کے ساتھ شدید بارشوں کی پیشگوئی کی ہے۔ محکمہ کے مطابق 6 سے 10 دسمبر کے دوران مغربی ہواؤں کا طاقتور سلسلہ بلوچستان میں داخل ہوگا، جس کے بعد بارشوں کا پہلا بھرپور اور طویل مرحلہ شروع ہو جائے گا اور یہ سلسلہ پورے مہینے وقفے وقفے سے جاری رہنے کی توقع ہے۔

بارشوں سے ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ جیسے قحط زدہ اضلاع میں نمایاں بہتری آئے گی۔ کئی علاقوں میں گرج چمک کے ساتھ موسلا دھار بارشیں ہوں گی جبکہ بالائی علاقوں میں برف باری کا بھی امکان ہے۔

ماہرین کے مطابق اس سال شمال مغربی ہوائیں معمول سے زیادہ فعال ہیں اور عرب سمندر سے آنے والی نمی بھی بلوچستان کی جانب مسلسل حرکت کر رہی ہے۔ انہی موسمی عوامل کے باعث یہ بارشیں زیر زمین پانی اور ڈیموں کے ذخائر میں خوشگوار اضافہ کرنے کا سبب بنیں گی اور خشک سالی کے اثرات کو کم کرنے میں مددگار ثابت ہوں گی۔