اردو ورلڈ کینیڈا ( ویب نیوز ) پاکستان بھر میں موسلا دھار بارشیں جاری ہیں، جس کے نتیجے میں کئی علاقوں میں شدید سیلاب اور انسانی و مالی نقصان کا خطرہ پیدا ہو گیا ہے۔
پنجاب کے ضلع میانوالی میں کرّام دریا کے اُبلنے کے سبب کُندل چڑھوالہ کے علاقے زیرِ آب آ گئے اور پانی گھروں میں داخل ہوگیا، جس سے متعدد رہائشی متاثر ہوئے۔ اسلام آباد میں ژالہ باری اور بارش نے موسم سرد کر دیا، جبکہ لاہور، راولپنڈی، مری، سرگودھا، گجرات، سیالکوٹ اور گوجرانوالہ میں بھی شدید بارشیں ہوئی ہیں۔
شمالی علاقوں میں ناران، سوات، بابو سرٹاپ اور ننگا پربت میں وقفے وقفے سے برف باری جاری ہے، جس سے سردی میں اضافہ ہوا ہے۔ خیبر پختونخوا اور قبائلی اضلاع میں موسلا دھار بارشوں کی وجہ سے کئی سڑکیں اور پل تباہ ہو گئے ہیں، اور پٰرچنار کے قریب ایک پل جزوی طور پر ٹوٹ گیا۔ پشاور، خیبر اور دیگر اضلاع میں سیلابی ریلوں نے گاڑیاں بہا دیں، جس کے نتیجے میں متعدد افراد ہلاک اور زخمی ہوئے ہیں۔ اسی طرح بلوچستان کے شمالی اضلاع میں ہلکی بارش اور برف باری نے موسم مزید سرد کر دیا ہے اور آزاد کشمیر میں بھی بارشیں جاری ہیں، جس سے ندی نالوں میں پانی کی سطح بڑھ گئی ہے۔
محکمہ موسمیات اور نیشنل ڈیزاسٹر مینجمنٹ اتھارٹی نے ملک بھر میں مزید بارش، ژالہ باری، تیز ہواؤں اور گرج چمک کے لیے الرٹ جاری کیا ہے اور عوام سے اپیل کی ہے کہ غیر ضروری سفر سے گریز کریں، ندی نالوں کے قریب نہ جائیں اور ڈیزاسٹر مینجمنٹ کی ہدایات پر عمل کریں۔ آئندہ چند روز میں خیبر پختونخوا، شمالی پنجاب اور پہاڑی علاقوں میں مزید بارش اور برف باری کے امکانات ہیں۔
