اردوورلڈکینیڈا(ویب نیوز)استور، ہنزہ اور گلگت بلتستان کے دیگر بالائی علاقوں میں برف باری کا سلسلہ بدستور جاری ہے جس کے باعث خطے میں سردی کی شدت میں نمایاں اضافہ ہو گیا ہے۔ مسلسل برف باری کے نتیجے میں گلگت میں خشک اور کڑاکے کی سردی نے شہریوں کو متاثر کر رکھا ہے، جبکہ کئی بالائی اور سرحدی علاقے شدید موسمی صورتحال کے باعث مشکلات کا شکار ہیں۔
بالائی سرحدی علاقوں منی مرگ، قمری اور شنکرگڑہ کی وادیوں میں دو فٹ تک برف پڑ چکی ہے، جب کہ رٹو، ناصرآباد اور پریشنگ سمیت دیگر بلند مقامات پر وقفے وقفے سے برف باری جاری ہے۔ تحصیل یاسین، پھنڈر اور خنجراب کے علاقوں میں بھی برف باری کی اطلاعات موصول ہوئی ہیں، جس کے باعث استور کے بالائی علاقوں کو ملانے والی متعدد رابطہ سڑکیں بند ہو چکی ہیں۔ سڑکوں کی بندش کے باعث کئی دیہات کے مکین محصور ہو کر رہ گئے ہیں اور روزمرہ ضروریات کی فراہمی میں مشکلات پیش آ رہی ہیں۔
نلتر میں گزشتہ چند دنوں سے جاری برف باری نے معمولاتِ زندگی کو شدید متاثر کیا ہے۔ دو توز کے مقام پر نو انچ تک برف جمع ہو چکی ہے۔ تاہم شدید سردی اور دشوار گزار حالات کے باوجود بڑی تعداد میں سیاح برف باری سے لطف اندوز ہونے کے لیے نلتر کا رخ کر رہے ہیں۔ ضلعی انتظامیہ نے سیاحوں کو احتیاطی تدابیر اختیار کرنے کی ہدایت کرتے ہوئے خبردار کیا ہے کہ ہائی الٹیچیوڈ علاقوں میں پھسلن کے باعث گاڑیوں کو حادثات کا سامنا ہو سکتا ہے۔ سیاحوں کی بڑھتی ہوئی آمد کے باعث نلتر کے ہوٹلوں میں گنجائش کم پڑ گئی ہے، جبکہ محکمہ موسمیات نے آئندہ چند روز کے دوران مزید برف باری کا امکان ظاہر کیا ہے۔
دوسری جانب مالم جبہ میں برف باری کے بعد موسم صاف ہونے اور دھوپ نکلنے سے سیاحوں کی بڑی تعداد حسین مناظر دیکھنے پہنچ گئی۔ سیاحوں نے چیئر لفٹ کی سیر کی اور خوشگوار موسم سے بھرپور لطف اٹھایا۔
ادھر ایبٹ آباد کے مختلف علاقوں میں بارش اور بالائی علاقوں میں برف باری کے باعث سردی میں اضافہ ہو گیا ہے۔ ہزارہ ڈویژن کے سیاحتی مقامات پر بھی سیاحوں کا رش دیکھا جا رہا ہے۔ انتظامیہ کے مطابق سڑکوں سے برف ہٹانے کا عمل جاری ہے، تاہم بارش اور برف باری کے باعث دیہی علاقوں میں بجلی کی بندش نے مکینوں کو شدید مشکلات میں مبتلا کر دیا ہے۔
بلوچستان کے ضلع کیچ میں بھی سردی کی آمد کے ساتھ ہی شاہراہوں پر گرم کپڑوں اور جوتوں کے عارضی بازار قائم ہو گئے ہیں۔ خریداروں کا کہنا ہے کہ مہنگائی کے دور میں یہ سستے بازار عوام کے لیے بڑی سہولت ثابت ہو رہے ہیں، جبکہ دکانداروں کے مطابق سردی بڑھنے کے ساتھ خریداروں کی تعداد میں مسلسل اضافہ ہو رہا ہے۔
