اردو ورلڈ کینیڈا ( ویب نیوز ) حزب اللہ مزاحمت کی جانب سے اسرائیل پر میزائل اور ڈرون حملے کیے گئے ، حملوں میں 2 اسرائیلی ہلاک اور 20 سے زائد زخمی ہوگئے۔حزب اللہ مزاحمت کی جانب سے اسرائیلی علاقے کریات شمونہ پر بھی ٹینک شکن میزائل داغا گیا جس سے ایک گھر کو آگ لگ گئی۔
یہ بھی پڑھیں
حزب اللہ نے اسرائیلی ڈرون تبا کر دیا
اسرائیلی وزیر اعظم نیتن یاہو نے فوجی تیاریوں کا جائزہ لینے کے لیے حملے سے چند گھنٹے قبل کریات شمونہ کا دورہ کیا۔دوسری جانب غزہ میں اسرائیلی فوج کے حملوں کا سلسلہ جاری ہے، گزشتہ 24 گھنٹوں کے دوران 70 سے زائد فلسطینی شہید ہوگئے۔اقوام متحدہ کے مطابق الاقصیٰ اسپتال میں سیکڑوں مریض لائے جا رہے ہیں جن میں سے زیادہ تر کی ہڈیاں جلی ہوئی ہیں، ٹوٹی ہوئی ہڈیاں ہیں یا تیز دھار چیزوں سے شدید زخمی ہیں۔
اقوام متحدہ نے خبردار کیا ہے کہ غزہ تک امدادی رسائی پر اسرائیلی پابندیوں کے باعث جولائی میں دس لاکھ سے زائد فلسطینیوں کو بدترین بھوک کا سامنا کرنا پڑ سکتا ہے۔غزہ کے محکمہ صحت کے مطابق گزشتہ 24 گھنٹوں کے دوران اسرائیلی حملوں میں 115 سے زائد افراد زخمی ہوئے ہیں۔ادھر یورپی ملک سلووینیا کی پارلیمنٹ نے بھی فلسطین کو بطور ریاست تسلیم کرنے کی منظوری دے دی ہے۔
سلووینیا کے ساتھ فلسطین کو تسلیم کرنے والے ممالک کی تعداد 146 ہو گئی ہے۔واضح رہے کہ 7 اکتوبر 2023 سے غزہ پر اسرائیل کے وحشیانہ حملوں میں اب تک 36 ہزار 586 سے زائد فلسطینی شہید اور 83 ہزار 74 افراد زخمی ہو چکے ہیں، شہید اور زخمی ہونے والوں میں نصف سے زائد صرف بچے اور خواتین ہیں۔
